Jalgaon Water Crisis : भुसावळच्या शिवदत्त नगरात पाणीटंचाई

Jalgaon Water Crisis : येथील शिवदत्तनगर भागात पाणीटंचाईमुळे नागरिक त्रस्त आहेत. पाणीटंचाईची समस्या सोडविण्याबाबत तेथील रहिवाशांनी मुख्याधिकारी महेश वाघमोडे यांना निवेदन दिले. उन्हाच्या झळा तीव्र झाल्या आहेत. त्यातच नगरातील बहुतांश बोअरवेल कोरडे पडत आहेत. नागरिक स्वतःचा पैसा, वेळ खर्च करून नव्याने बोअरवेलचे काम करत आहेत, पण २५० ते ३५० फुटावर सुद्धा पाणी लागत नसल्याचे चित्र सध्या शिवदत्त नगर भागात दिसून येत आहे. (Jalgaon Water Crisis Water shortage in Shiv dutt Nagar of Bhusawal)

येत्या एप्रिल, मे महिन्यात उन्हाचा कडाका आणखी वाढणार आहे. या भागात प्रशासनाकडून जलवाहिनी टाकली गेली. मात्र त्याला पाच वर्षे उलटून गेले, पण पाण्याचा एक थेंब सुद्धा आला नाही. परिसरातील भागांना पाणीपुरवठा करणारी टाकी आहे.

जलवाहिनीच्या माध्यमातून शिवदत्त नगर भागासाठी या पाणी टाकीतून पाणीपुरवठा करावा.

प्रशासनाने लवकरात लवकर शिवदत्त नगरवासीयांचा पाणी प्रश्न सोडवावा, अशी मागणी नागरिकांनी मुख्याधिकारी महेश वाघमोडे यांच्याकडे केली.

या वेळी बी. वाय. सोनवणे, नगरसेवक राजू आवटे, वेदप्रकाश ओझा, मनीष पवार, विजय यादव, आयुष श्रीवास, शैलेश वर्मा आदी नागरिक उपस्थित होते.