Jalgaon ZP News : शाळाखोल्या दुरुस्तीने शिक्षण घेणे सुसह्य; रावेर तालुक्यात शाळांची स्थिती समाधानकारक

Jalgaon ZP News : तालुक्यात मागील वर्षी पावसाळ्यात अनेक शाळांची दुरवस्था झाली होती. प्रशासनाने वेळीच दखल घेऊन गळती लागलेल्या शाळांची दुरुस्ती केली आहे. परिणामी, खोल्यांची दुरुस्ती झाल्याने व पुरेशे वर्ग उपलब्ध झाल्याने विद्यार्थ्यांना शिक्षण घेणे सोयीचे ठरणार आहे. जिल्हा परिषद प्राथमिक मराठी व उर्दू शाळा खोल्यांची स्थिती चांगली आहे. शनिवारी (ता. १५) शाळेत विद्यार्थ्यांचे गुलाबपुष्प देऊन स्वागत होणार आहे. ( zp Studying is tolerable by repairing schoolroom )

तालुक्यातील १५४ शासकीय व ७० अनुदानित, अशा २२४ शाळा आहेत. १५ दिवसांपूर्वी वादळी पावसामुळे तांदलवाडी येथील शाळेवर झाड उन्मळून पडल्यामुळे एका खोलीचे नुकसान झाले. ही खोली किचन रूम होती. मात्र, शाळेला अतिरिक्त खोली असल्यामुळे खोलीच्या कमतरतेचा प्रश्न नाही.

शिक्षकांची ५४ पदे रिक्त

तालुक्यात ४८९ शिक्षकांची पदे आहेत. यात ४३५ शिक्षक कार्यरत आहेत, तर ५४ पदे रिक्त आहेत. रिक्त शिक्षकांची पदे भरून विद्यार्थ्यांचे शैक्षणिक नुकसान टाळण्याची गरज आहे. शिक्षकांच्या बदलीसंदर्भात राज्य शासन स्तरावरून कोणतेही आदेश नसल्यामुळे शिक्षक बदलीसंदर्भात कोणतीही भूमिका घेता येणार नाही, अशी माहिती गटरीक्षणाधिकाऱ्यांनी दिली. (latest marathi news)

विद्यार्थ्यांचे होणार जल्लोषात स्वागत

शनिवारी शाळेत स्वच्छता, रांगोळ्या काढून व पताका लाऊन विद्याथ्यांचे गुलाबपुष्प देऊन स्वागत होणार आहे. प्रत्येक विद्यार्थ्याचे वजन, उंची मोजली जाईल व त्यांच्या शारिरिक प्रकृतिविषयी नोंद करण्यात येईल. ३१ हजार ४६३ विद्यार्थ्यांना मोफत पाठ्यपुस्तके देण्यात येणार आहेत.

''वर्गसंख्येच्या प्रमाणात तालुक्यात पुरेशा वर्ग खोल्या आहेत. शाळेच्या इमारती सुस्थितीत आहेत. मागील वर्षी शाळा खोल्यांची दुरुस्ती केली आहे. या वर्षी शाळा खोल्या गळणार नाही, अशी स्थिती आहे. केंद्रप्रमुख व मुख्याध्यापकांना शाळा खोली गळत असेल, तर अहवाल पाठविण्याच्या सूचना दिल्या आहेत.''-शैलेश दखने, प्रभारी गटाशिक्षणाधिकारी, पंचायत समिती, रावेर