जळगाव : सर्व कोविड केअर सेंटर सुसज्ज ठेवा

जळगाव : राज्यातील मोठ्या शहरात झपाट्याने होणारी कोविड रुग्णांची वाढ पाहता, खबरदारीचा उपाय म्हणून सर्व यंत्रणांनी सतर्क राहावे. कोविड रुग्णांची संसर्ग साखळी खंडित होत असली तरी आगामी सण, उत्सवाच्या पार्श्वभूमीवर ओमिक्रॉन व कोविड आजाराचा प्रादुर्भाव रोखण्यासाठी विविध उपाययोजना तातडी कराव्यात, असे निर्देश जिल्हाधिकारी अभिजित राऊत यांनी शुक्रवारी (ता. ३१) अधिकाऱ्यांना दिलेत.(Keep all Covid Care Centers equipped)

जिल्हाधिकारी कार्यालयात आयोजित आढावा बैठकीत ते बोलत होते. यावेळी मुख्य कार्यकारी अधिकारी डॉ. पंकज आशिया, महानगरपालिका आयुक्त सतीश कुलकर्णी, निवासी उपजिल्हाधिकारी राहुल पाटील, जिल्हा शल्यचिकित्सक डॉ. एन. एस. चव्हाण, जिल्हा आरोग्य अधिकारी डॉ. बी. डी. जमादार, राज्य उत्पादन शुल्कच्या सीमा झाबरे, शासकीय वैद्यकीय महाविद्यालयाचे डॉ. विजय गायकवाड, अन्न औषध प्रशासनचे सहायक आयुक्त वि. ब. तासखेडकर, पोलिस यंत्रणेतील वरिष्ठ अधिकारी आदींची उपस्थिती होती.(Jalgaon news)