व्हायरस पसरतोय..बोदवड, पाचोऱ्यातही कोरोनाचा विस्‍फोट‍

जळगाव : जिल्‍ह्‍यातील कोरोनाचा संसर्ग कायम वाढता आहे. मागील चोवीस तासात जिल्‍ह्‍यात १ हजार १४१ नवीन बाधित आढळून आले. विशेष म्‍हणजे चोपडा तालुक्‍यातील होणारा विस्‍फोट आज कमी झाला; मात्र बोदवड आणि पाचोरा तालुक्‍यात विस्‍फोट झालेला दिसून आला.
जिल्‍ह्‍यात मागील चोवीस तासात आढळून आलेल्‍या बाधितांचा अहवाल जिल्हा प्रशासनाकडून देण्यात आला. त्‍यानुसार जिल्ह्यात आढळून आलेल्या रूग्णांपेक्षा बरे होणारे रूग्ण जास्त असले तरी दिवसभरात जिल्ह्यात आज १ हजार १४१ नवीन रूग्ण आढळून आले आहेत. तर १ हजार १७१ रूग्ण बरे होवून घरी परतले आहे. 

पुन्हा चौदा जणांचा बळी
जिल्‍ह्‍यातील मृत्‍यूचा आकडा कमी होण्याचे नाव घेत नाही. मागील आठवडाभरापासून जिल्‍ह्‍यात मृत्‍यूचा आकडा तेरा ते पंधराच्या दरम्‍यान आहे. कोरोना अहवालानुसार आज दिवसभरात पुन्हा १४ रूग्‍णांचा कोरोनाने मृत्‍यू झाला आहे. यामुळे जिल्‍ह्‍यातील एकूण मृतांचा आकडा सतराशेच्यावर पोहचला आहे. तसेच जिल्ह्यात आजपर्यंत ९७ हजार ९९ बाधित रूग्ण आढळून आले असून, त्यापैकी ८३ हजार ६७१ रूग्ण बरे होवून घरी पतरले आहे. तर ११ हजार ७०२ रूग्ण विविध कोवीड रूग्णालयात उपचार घेत आहे. 

असे आढळले रूग्‍ण
जळगाव शहर १६८, जळगाव ग्रामीण २७, भुसावळ १०२, अमळनेर ५३, चोपडा ७९, पाचोरा १२१, भडगाव ३२, धरणगाव ५५, यावल ६२, एरंडोल ४१, जामनेर ४४, रावेर ८८, पारोळा ३७, चाळीसगाव ३२, मुक्ताईनगर ९२, बोदवड १०३ आणि इतर जिल्ह्यातील ५ असे एकुण १ हजार १४१ बाधित रूग्ण आढळून आले आहे.