फडणवीस- खडसेंचा फोनवर संवाद; खडसेंचा भोजनासाठी आग्रह

जळगाव : पक्ष सोडायला भाग पाडल्याचा वाद कायम असताना माजी मंत्री एकनाथराव खडसेंनी (Eknath khadse) त्यांच्या अपुस्थितीत निवासस्थानी आलेल्या विरोधी पक्षनेते देवेंद्र फडणवीसांना (Devendra Fadnavis) ‘जेवल्याशिवाय जाऊ नका..’ अशी साद घालत आदरातिथ्य दर्शवले. मात्र, फडणवीसांनी ‘आता नाही, पुढच्या वेळी नक्की जेऊ..’ असे नम्रपणे सांगत खडसेंना प्रतिसादही दिला.. निमित्त होते, त्यांच्या मुक्ताईनगर दौऱ्याचे. (jalgaon-news-devendra-fadnavis-eknath-khadse-phone-conversation)

वादळामुळे नुकसान झालेल्या मुक्ताईनगर, रावेर तालुक्यातील भागाची पाहणी करण्यासाठी फडणवीस मंगळवारी जिल्ह्यात आले होते. जामनेरहून ते थेट मुक्ताईनगरला गेला. खासदार रक्षा खडसेंच्या आग्रहाखातर फडणवीस कोथळीत खडसेंच्या निवासस्थानी चहापानासाठी गेले. माजी मंत्री गिरीश महाजन, आमदार संजय सावकारे आदी त्यांच्यासोबत होते. फडणवीस त्याठिकाणी जवळपास अर्धातास होते. तेथेच त्यांनी चहापान घेतले.

सावकारे बनले माध्यम

फडणवीस खडसेंच्या निवासस्थानी कोथळीत पोचले, तेव्हा खडसे मुंबईत होते. रक्षा खडसेंनी त्यांचे स्वागत केले. चहापान सुरु असताना भुसावळचे आमदार संजय सावकारे यांनी भ्रमणध्वनी करत खडसे व फडणवीसांमध्ये संभाषण घडवून आणले.

असा होता संवाद..

फोनवरुन नमस्कार झाल्यानंतर खडसे म्हणाले, ‘मी, इकडे मुंबईत आहे.. आपण आलात, आपले स्वागत आहे. मी नसलो तरी जेवल्याशिवाय जाऊ नका..’ या आग्रही विनंतीला फडणवीसांनी ‘आपल्या भागात आलोय. जेवणाचे नियोजन अन्य ठिकाणी आधीच झालेले आहे. पुढच्या वेळी आपल्याकडे नक्की भोजन करेल..’ असे नम्रपणे सांगितले. उपस्थित असलेल्या रक्षा खडसे, गिरीश महाजन, अशोक कांडेलकर आदींनी हा संवाद अनुभवला. खडसे आता भाजपत नाही, ते राष्ट्रवादीचे नेते झाले. फडणवीसांवर नाराजी व्यक्त करत त्यांनी पक्ष सोडला. दोघा नेत्यांमध्ये त्यामुळे शाब्दिक वादही झालेत. मात्र, राजकीय मतभेदापलीकडचे संबंध व त्यातून अनुभवायला आलेल्या या आदरातिथ्याची चर्चा जिल्ह्यात सध्या सुरु आहे.