जळगावच्या सर्व तालुक्यांत कोरोनाचे नव्या रुग्णांची नोंद नाही

जळगाव : जिल्ह्यातून कोरोना (corona) हद्दपार होत असल्याची चिन्हे आहेत. सोमवारी जिल्हाभरात केवळ चोपडा तालुक्यात एकमेव रुग्ण (Corona Patient) समोर आलेला असताना मंगळवारी जळगाव शहर वगळता अन्य सर्व तालुक्यांमध्ये एकाही रुग्णाची नोंद नाही. जळगाव शहरात मात्र ३ नवे बाधित आढळून आलेत.

जळगाव जिल्ह्यात कोरोनाचा संसर्ग पूर्णपणे नियंत्रणात येत असून महिनाभरापासून संसर्गदरही एक टक्क्यांच्या आत आहे. दररोज आढळून येणाऱ्या नव्या बाधितांची संख्या नगण्य असताना बरे होणाऱ्यांचा आकडा त्यापेक्षा जास्तच असल्याने सक्रिय रुग्णसंख्याही आता ६४पर्यंत खाली आली आहे.

जळगावात ३ नवे रुग्ण

सोमवारी ३८६६ चाचण्यांचे अहवाल प्राप्त झालेत. पैकी केवळ १ रुग्ण चोपडा तालुक्यातून समोर आला. मंगळवारी जळगाव शहरातून तीन नवे बाधित आढळून आले. तर अन्य सर्व तालुक्यांमधील आकडा शून्य होता.

मृत्यूची नोंद नाही

जिल्ह्यातील एकूण रुग्णसंख्या १ लाख ४२ हजार ६०९ झाली आहे. दिवसभरात ८ रुग्ण बरे झाले असून बरे होणाऱ्यांचा आकडा १ लाख ३९ हजार ९७०वर पोचला आहे. आज सलग एकोणिसाव्या दिवशी जिल्ह्यात मृत्यूची नोंद नाही, ही मोठी समाधानकारक बाब ठरली आहे. सध्या जिल्ह्यात सक्रिय असलेल्या ६४ पैकी केवळ १५ रुग्ण ऑक्सिजनवर तर ७ रुग्ण आयसीयूत आहेत.