जळगाव जिल्ह्यात ७० टक्के लसीकरण

जळगाव ः जिल्ह्यात कोविड लसीकरणाने (Covid Vaccination) आता चांगलाच वेग धरला आहे. आतापर्यंत १८ वर्षांवरील ७० टक्के नागरिकांना लसीकरण झाल्याची माहिती जिल्हा शल्यचिकित्सक डॉ. एन. एस. चव्हाण यांनी दिली. आतापर्यंत एकूण २२ लाख ३७ हजार ६५५ नागरिकांचे लसीकरण झाले आहे.

जळगाव जिल्ह्यात १८ वर्षांवरील ३० लाख नागरिक आहेत. त्यापैकी २२ लाख ३७ हजार जणांना (७० टक्के) लसीकरण झाले. त्यात पहिला डोस घेणाऱ्यांची संख्या १६ लाख ९० हजार ५७८, तर दोघे डोस घेणाऱ्यांची संख्या पाच लाख ४७ हजार ७७ आहे. १२ ते १३ टक्के नागरिकांनी दोघे डोस घेतले आहेत.

मागणी केल्यास घरी लस
आतापर्यंत अनेक दिव्यांनी लसीकरण केंद्रावर येऊन लस घेतली आहे. दिव्यांग आल्याबरोबर त्यांना लसीकरण केले जाते. लसीकरणासाठी त्यांना रांगेत उभे राहू लागू नये, यासाठी दक्षता घेण्यात आली आहे. लस न घेतलेल्या काही दिव्यांग बांधवांनी मागणी केली, तर घरी येउन लसीकरण करण्याची व्यवस्था करण्यात येईल. त्यासाठी त्यांना घरपोच लसीकरणाचे पत्र द्यावे लागणार आहे.