कडक लॉकडाउनसाठी जिल्हाधिकारीच रस्त्यावर...पोलिसांची उडाली धावपळ 

जळगाव : जळगावसह भुसावळ, अमळनेर येथे लाकडाउन पाळण्यात आला आहे. त्यास नागरिकांनी स्वयं स्फूर्तीने प्रतिसाद देत आहेत. सकाळपासून सायंकाळपर्यंत सर्वच रस्ते सामसूम होते. पोलिसांचा ठिकठिकाणी बंदोबस्त असल्याने विनाकारण बाहेर फिरणाऱ्यांना चाप बसली आहे. असे असले तरी लॉकडाउन कडक करण्यासाठी जिल्हाधिकारी अभिजीत राऊत रस्त्यावर उतरले होते. 
जिल्ह्यात कोरोनाचा संसर्ग वाढत असल्याने आजपासून 13 जुलैपर्यंत जळगाव महापालिका, भुसावळ, अमळनेर पालिका क्षेत्रात आजपासून "लोकल लॉकडाऊन' जिल्हाधिकारी अभिजित राऊत यांनी जाहीर केला. त्यात दूध, औषधी, कृषी विषयक बाबी वगळून सर्वच बंद करण्यात आल्याने शहरात सर्वत्र आज सामसूमच होती. एरवी गर्दीने गजबजणारी ठिकाणांवर शुकशुकाट होता. 

कसून चौकशी अन्‌ शुकशुकाट 
शहरातील टॉवर चौक, चित्रा चौक, एस.टी वर्कशॉप, अजिंठा चौफुली, कालिंकामाता चौक, इच्छादेवी चौक, खोटेनगर आदी परिसरात पोलिसातर्फे कडक तपासणी केली जात होती. येणाऱ्या जाणाऱ्यांकडे पासेस आहेत किंवा नाही, शहरात जाण्याचे कारणे आदी बाबी तपासूनच गरज असेल नागरिकांना शहरात प्रवेश दिला जात होता. 
अनलॉकच्या काळात व्यापारी संकूले बंद असली तरी अत्यावश्‍यक सेवा सुर असल्याने भाजीपाला, किराणा आदी वस्तू घेण्यासाठी सुभाष चौक, दाणाबाजार, टावर चौक, चौबे शाळा, उपनगरातील चौकात नागरिकांची तोबा गर्दी होत होती. पण "लोकल लॉकडाउन'मुळे सर्वच ठिकाणी आज शुकशुकाट दिसून आला. 

जिल्हाधिकाऱ्यांची प्रत्यक्ष पाहणी 
लोकल लॉकडाउनच्या अंमलबजावण्यासाठी जिल्हाधिकारी अभिजित राऊत आज रस्त्यावर उतरले. इच्छादेवी चौक, अजिंठा चौफुली, दाणा बाजार, सुभाष चौक, महापालिकेच्या परिसरात श्री. राऊत यांनी पाहणी केली. येणाऱ्या जाणाऱ्यांना पोलिस सोडतात का? काय विचारणा करतात याची पाहणी केली. घाणेकर चौकात तगडा पोलिस बंदोबस्त होता. तेथील पोलिसांकडून आढावा घेत लागलीच ते कार्यालयात आले.