रावेर : ढगाळ हवामान आणि केळीवरील करपा रोगामुळे केळीची कमी झालेली पाने यामुळे तालुक्यातील सुमारे ५ हजार हेक्टरवरील केळी झाडावरच पिकण्याचे प्रकार वाढले आहेत. केळीच्या कमी भावामुळे आधीच मेटाकुटीला आलेल्या शेतकऱ्यांवर हे आणखी दुसरे संकट येऊन शेतकऱ्यांचे लाखो रुपयांचे नुकसान होत आहे.
२०२० च्या मार्च, एप्रिल आणि मे महिन्यात लागवड झालेल्या केळीच्या बागा आता कापणीवर आल्या आहेत. याच केळी बागांचे घड झाडावरच पिकून पिवळे होण्याचे प्रकार वाढले आहेत. कापणीला आलेल्या एकूण झाडांपैकी ३० ते ३५ टक्के केळी झाडांवरील घड पिवळे होऊन पिकले आहेत. ही केळी कोणताही व्यापारी खरेदी करायला तयार नाही किंवा या पिकलेल्या केळीचे वेफर्स देखील होत नाहीत. यामुळे वापसी केळीच्या विक्रेत्याला नाममात्र किमतीत केळी विकून टाकणे किंवा गाई-म्हशींना खायला देणे एवढा एकच पर्याय केळी उत्पादक शेतकऱ्यांसमोर उरला आहे. अशी केळी पिकण्याचे प्रमाण तालुक्यातील पूर्व, उत्तर आणि पश्चिम भागात मोठ्या प्रमाणावर आहे.
करपामुळे पानांची संख्या झाली कमी
याबाबत तालुका कृषी अधिकारी मयूर भामरे यांच्याशी संपर्क साधला असता त्यांनी सांगितले, की केळीवरील करपा रोगामुळे केळीच्या झाडावरील पानांची संख्या कमी झाली आहे. त्यामुळे केळीचे घड पिकतात. केळीला घड येण्यापूर्वी जर शेतकऱ्यांनी करपासाठी लागणाऱ्या औषधांची फवारणी केली असती तर केळीचे घड पिकले नसते.
ढगाळ हवामान आणि दमट वातावरण यामुळे केळी झाडावरच पिकून शेतकऱ्याचे ३० ते ४० टक्के नुकसान होत आहे. आज माझ्या केळी बागेतील सुमारे १०० झाडे कापली त्यातील ३० पेक्षा जास्त घड पिकले आहेत
- किशोर गनवाणी, केळी उत्पादक शेतकरी व व्यापारी, रावेर
संपादन- भूषण श्रीखंडे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.
