जळगाव : गिरणा परिक्रमेची जलशक्ती मंत्रालयाकडून दखल

जळगाव : खासदार उन्मेष पाटील यांनी १ जानेवारीपासून सुरू केलेल्या गिरणा परिक्रमेची केंद्रीय जलशक्ती मंत्रालयाने दखल घेतली आहे. खासदार पाटील यांनी देवेंद्र फडणवीस यांच्या नेतृत्वात मंत्री गजेंद्रसिंह शेखावत यांची भेट घेऊन बलून बंधारे प्रकल्पाचा पंतप्रधान सिंचन योजनेतील समावेशाबाबत आग्रह धरला.

माजी मुख्यमंत्री फडणवीस यांनी तापी निम्न पाडळसरे प्रकल्पाचा धरण पूर्ण करण्यासाठी त्यांच्या कारकीर्दीत झालेल्या प्रवासाचा लेखाजोखा केंद्रीय जलशक्ती मंत्रालयासमोर मांडत कुठल्याही परिस्थितीमध्ये केंद्र सरकारने प्रधानमंत्री कृषी सिंचन योजनेत तापी निम्न पाडळसरे प्रकल्पाचा समावेश करावा, यासाठी आग्रह धरला.

परिक्रमेबाबत माहिती

खासदार पाटील यांनी गिरणा पुनरुज्जीवन अभियानातून सात बलून बंधारेबाबत जनजागृती करीत गिरणेचे वैभव पुन्हा प्राप्त करून देण्यासाठी गिरणा काठावरील ग्रामस्थांशी संवाद साधत असून, सात बलून बंधारेसह तापी निन्म पाडळसरे प्रकल्पाचा पंतप्रधान कृषी सिंचन योजनेत समावेशासाठी मंत्र्यांना विनंती केली.

जलशक्ती मंत्रालय अनुकूल

मंत्री शेखावत यांनी पाडळसरे प्रकल्पबाबत प्रधानमंत्री जलसिंचन योजनेत समावेशाबाबत जलशक्ती मंत्रालय अनुकूल असून लवकरच निधीबाबत तरतूद होईल असे आश्‍वस्त केले आहे.

‘बलून’साठी हवी पर्यावरण मान्यता

सात बलून बंधाऱ्यांच्या सर्व मान्यता मिळाल्या असून, आता राज्य सरकारच्या वतीने पर्यावरण मान्यता प्रस्ताव केंद्राकडे पाठवण्यात आलात तरच सात बलून बंधाऱ्याच्या निधी मंजुरीचे काम मार्गी लागणार आहे. संपूर्ण निधी हा केंद्र सरकार देणार असून राज्य सरकारने पर्यावरण मान्यतेसाठी लवकर प्रस्ताव केंद्राकडे पाठवल्यास सात बलून बंधारे प्रस्तावावर देखील लवकर कार्यवाही करण्यात येईल, अशी हमी शेखावत यांनी या वेळी दिली.