MLA Mangesh Chavan : एकनाथ खडसेंचे आरोप चुकीचे : आमदार मंगेश चव्हाण

MLA Mangesh Chavan : आपण कधीही भंगार विक्रीचा व्यवसाय केलेला नाही. आपण आपल्या कष्टाने कमविले आहे. एकनाथ खडसे यांनी केलेले आरोप चुकीचे आहे, असे मत भाजप आमदार मंगेश चव्हाण यांनी सोमवारी (ता. ३१) येथे व्यक्त केले.

येथील अजिंठा शासकीय विश्रामगृहावर झालेल्या पत्रकार परिषदेत ते बोलत होते. ग्रामविकास मंत्री गिरीश महाजन, पालकमंत्री गुलाबराव पाटील, आमदार सुरेश भोळे या वेळी उपस्थित होते. (MLA Mangesh Chavan statement Eknath Khadse allegations are wrong jalgaon news )

श्री. खडसे यांच्या आरोपाला उत्तर देताना आमदार चव्हाण म्हणाले, की एकनाथ खडसे आता काहीही बरळू लागले आहेत. ती एक विकृती आहे. मी कधीही भंगार विकलेले नाही. मी कष्टाने कमविले आहे. राजकारणात आपण गिरीश महाजन यांच्या मदतीने पुढे आलो आहोत.

एकनाथ खडसे यांची आपण कधीही मदत घेतलेली नाही. त्यांना आपण साधा फोनही आजपर्यंत केलेला नाही. आपण प्रामणिकपणे पक्षाचे काम करीत आहोत.

हेही वाचा : Credit Card फसवणूक....काय घ्याल काळजी?

त्यांनीच पक्षाशी गद्दारी केली आहे. त्यांच्याकडे वडिलोपार्जित किती शेती आहे, ते शेतीत किती पिकवितात, याची सर्व माहिती आपल्याकडे आहे.

वेळ आल्यावर ती माहिती आपण जाहीर करू. त्याच परिसरात शंभर एकर शेती असलेले शेतकरी आहेत, त्यांना कष्ट करूनही एवढे उत्पन्न मिळत नाही. मात्र, खडसे यांना एवढे उत्पन्न कसे मिळते, हाही एक प्रश्‍न आहे.

जिल्हा दूध संघात त्यांचेही नेतृत्व होते. आज आपण कामकाज करीत आहोत. त्यांच्या व आपल्या काळातील तुलनात्मक अभ्यासही लवकरच दिसून येईल, असेही त्यांनी स्पष्ट केले.