Jalgaon News : जळगाव जिल्ह्याच्या प्रश्‍नांबाबत आज मुंबईत होणार बैठक

जळगाव : जिल्ह्यातील उद्योग-व्यापार क्षेत्राच्या विविध प्रलंबित प्रश्‍नांसंबंधी गुरुवारी (ता. ९)विशेष बैठक होणार असल्याची माहिती महाराष्ट्र चेंबर ऑफ कॉमर्स अ‍ॅन्ड इंडस्ट्रीचे अध्यक्ष ललित गांधी व जळगाव जिल्हा विकास परिषदेच्या संयोजिका संगीता पाटील यांनी दिली.

महाराष्ट्र चेंबर ऑफ कॉमर्स, इंडस्ट्री अ‍ॅन्ड अ‍ॅग्रीकल्चरतर्फे १६ फेब्रुवारीस जळगाव जिल्हा विकास परिषद झाली. या परिषदेत जिल्ह्याच्या उद्योग व व्यापार क्षेत्राच्या विविध प्रश्‍नांवर चर्चा झाली होती. या परिषदेत उद्योग मंत्र्यांनी जिल्ह्यातील प्रलंबित प्रश्‍नांसंदर्भात मुंबईत बैठक घेण्याचे आश्‍वासन दिले होते. त्यानुसार ही बैठक होत आहे.

बैठकीस आमदार सुरेश भोळे, उद्योग मंत्रालयाचे प्रधान सचिव हर्षदीप कांबळे, ऊर्जा विभागाचे प्रधान सचिव दिनेश वाघमारे, कामगार मंत्रालयाचे प्रधान सचिव विनिता सिंगल, दीपेंद्र कुशवाह, औद्योगिक विकास महामंडळाचे सीईओ विपिन शर्मा, महावितरण कंपनीचे व्यवस्थापकीय संचालक विजय सिंघल, जिल्हाधिकारी अमन मित्तल आदी उपस्थित राहतील.