Jalgaon Voter List : मराठी यादीत बंगाली भाषेत मतदाराचे नाव

Jalgaon Voter List : मतदारयादीत सर्व नावे मराठीत असताना केवळ एका मतदाराचे नाव बंगालीत प्रकाशित झाल्याने नागरिकांनी आश्‍चर्य व्यक्त केले आहे.

मराठी यादीत बंगाली भाषा आलीत कशी, याबाबत प्रश्‍नचिन्ह निर्माण झाले आहे.()

शहरातील भिलपुरा, मरिमाता मंदिर परिसरातील भाग क्रमांक ११३ ची मतदारयादी निवडणूक विभागातर्फे प्रसिद्ध झाली आहे. माजी नगरसेवक किशोर चौधरी मतदार यादी पाहत असताना त्यांना या प्रभागातील मतदारसंघातील सर्व नावे मराठीत असताना एका मतदाराचे नाव चक्क बंगाली भाषेत आढळले.

मतदार यादीतील ८०५ क्रमांकाचे मतदाराचे, आईचे नाव, घर क्रमांक बंगाली भाषेत असून वय, लिंग मात्र मराठीत आहे. मात्र याच पानावरील इतर सर्व नावे व्यवस्थित मराठीतच प्रसिद्ध झाले असल्याचे सांगण्यात आले.

पाटील यांनी परिसरातील बंगाली कारगिराकडून हे नाव बंगालीच असल्याबाबत खात्री करून घेतली. त्यांनी या मतदार यादीची फोटो कॉपीही पाठविली आहे.

पाटील यांनी सर्व नावे मराठीत असताना एकच नाव बंगाली भाषेत कसे आले, याबाबत आश्‍चर्य व्यक्त केले. याबाबत कोणतीही तक्रार नसून निवडणूक आयोगाने खुलासा करावा अशी मागणी त्यांनी केली.