Jalgaon Agriculture News : जिल्ह्यात गहू, हरभरा, मका पेरणीला वेग; अवकाळीमुळे ‘रब्बी’ला उशीर

Jalgaon Agriculture News : जिल्ह्यात मध्यंतरी झालेल्या अवकाळी पावसामुळे रब्बी हंगामातील गव्हाची पेरणी एका पंधरवड्याने खोळंबली होती.

मात्र सध्या गव्हाच्या पेरणीने जिल्ह्यासह खानदेशात वेग घेतला असून, डिसेंबर अखेरपर्यंत ही पेरणी पूर्ण होण्याची शक्यता आहे.(Wheat gram maize sowing speed in district jalgaon agriculture news)

यावर्षी गव्हाची पेरणी वेळेवर होऊ शकली नाही, जमिनीत ओल असल्यामुळे वखरणी किंवा ट्रॅक्टरच्या सहाय्याने जमीन तयार करण्यास उशीर झाला पर्यायाने गहू, हरभरा, मका व भुईमुगाची पेरणी दहा ते पंधरा दिवसाच्या उशिराने होत आहे.

खानदेशात जळगाव, धुळे, नंदुरबार जिल्ह्यात चोपडा, यावल, चाळीसगाव, पाचोरा, भडगाव, धरणगाव, एरंडोल, शहादा, शिरपूर, साक्री व शिंदखेडा आणि धुळे जिल्ह्यातील आजूबाजूचा परिसर तसेच तळोदा, नंदुरबार या भागात गव्हाची पेरणी केली जाते.

खरीप हंगामातील कपाशीचे पीक निघाल्यावर त्याखालील सुमारे ३५ टक्के क्षेत्रावर ही पेरणी होते. यावर्षी शासकीय अनुदानातून तसेच बाजारातून बियाण्याच्या ४० किलोची बॅग सतराशे ते १९०० रुपये खर्च करून शेतकऱ्यांनी बियाणे खरेदी केले असून ९० टक्के पेरणी ट्रॅक्टरच्या सहाय्याने केली जात आहे.

खानदेशात चोपडा, धरणगाव, एरंडोल या भागात ही पेरणी अधिक प्रमाणात होते. गव्हाच्या भावात यावर्षी थोडी तेजी असल्यामुळे आणि पेरणी आणि कापणीसाठी अडचण येत नसल्याने शेतकरी गव्हाच्या पेरणीकडे वळतात.

यावर्षी पेरणीला उशीर झाल्यामुळे एकरी उत्पादनात एक ते दीड क्विंटलने घट होणार असली तरी थंडीचा हंगाम लक्षात घेता ही पेरणी उशिरा जरी असली तरी ती पूर्ण करण्याच्या तयारीला शेतकरी लागले आहेत.