Jalgaon News: हौदात बुडून कामगाराचा चटई कंपनीमध्ये मृत्यू

Jalgaon News : चटई कंपनीत रात्रपाळीवर कामासाठी आलेल्या कामगाराचा कंपनीच्या आवारातील पाण्याच्या हौदात बुडून मृत्यू झाल्याची घटना घडली. गणेश वसंत सोनार (३०, रा. साईनगर, सुप्रिम कॉलनी) असे मृत तरुणाचे नाव आहे.

एमआयडीसी पोलिस ठाण्यात या प्रकरणी अकस्मात मृत्यूची नोंद करण्यात आली आहे.मृत्युच्या कारणाचा शोध पेालिस घेत आहेत. (Worker dies of drowning in mat company jalgaon news)

जळगाव एमआयडीसीतील जे सेक्टरमध्ये मीनाक्षी गोल्ड या चटई कंपनीत ही घटना घडली.कंपनीमध्ये गणेश वसंत सोनार हा तरुण कामाला होता. रविवार(ता.१७) रात्रपाळीला गणेश हा कामावर गेला होता.

कंपनीच्या आवारात असलेल्या हौदात रात्रीच्या सुमारास गणेश हा बुडाला. रविवारी सकाळच्या सुमारास दुसऱ्या शिफटमधील कर्मचारी ड्युटीवर आल्यानंतर त्यांना हौदात गणेश हा बुडालेला दिसून आला.

त्यांनी लागलीच घटनेची माहिती एमआयडीसी पोलिसांना मिळाल्यावर सहाय्यक फौजदार अतुल वंजारी, रामकृष्ण पाटील, किशोर पाटील यांनी घटनास्थळी धाव घेतली.

एमआयडीसी पोलिसांनी कंपनीतील इतर कामगारांच्या मदतीने गणेशचा मृतदेह हौदातून बाहेर काढला. त्यानंतर पंचनामा करून मृतदेह शासकीय रूग्णालयात आणला गेला. मुख्य वैद्यकीय अधिकाऱ्यांनी तपासणीअंती गणेशला मृत घोषीत करताच कुटूंबीयांसह नातेवाईकांनी आक्रोश केला. गणेश नेमका कसा बुडाला किंवा काय दुर्घटना झाली याचा पोलिस शोध घेत आहे.