Mumbai-Goa Highway : मुंबईहून कोकणात देवदर्शनासाठी निघालेल्या टेम्पो ट्रॅव्हलरचा अपघात; 10 भाविक गंभीररित्या जखमी

खेड : मुंबईहून दहा भाविकांसह कोकणात देवदर्शनासाठी निघालेली टेम्पो ट्रॅव्हलर रत्नागिरी- गणपतीपुळे येथून मुंबईला जात असताना खेड तालुक्यातील मुंबई-गोवा महामार्गावरील (Mumbai-Goa Highway) तुळशीफाटा येथे आली असताना चालकाचे नियंत्रण सुटल्याने टेम्पो ट्रॅव्हलर विरुद्ध बाजूला जाऊन तेथे असलेल्या मोरीवर आदळून अपघात (Road Accident) झाला.

या अपघातात १० भाविक गंभीररित्या जखमी झाले आहेत. त्यांना महामार्गावरील कळंबणी ग्रामीण उपजिल्हा रुग्णालयात दाखल केले असता त्यांच्यावर प्राथमिक उपचार करून त्यांना पनवेल येथील खासगी रुग्णालयात दाखल करण्यात आले. हा अपघात बुधवारी (ता. ३) सकाळी सव्वानऊ वाजता झाला.

या अपघातात जखमी झालेले सर्व भाविक हे अमरावती येथील आहेत. चालक शैलेश संपत बिरामने (३२, रा. कोपरखैरणे, नवी मुंबई) हा टेम्पो ट्रॅव्हलरने (एमएन-४३-बीपी-६९०१) गणपतीपुळ्याहून मुंबईला जात असताना तुळशीफाटा येथे गाडीचा मागील टायर फुटल्याने चालकाचे नियंत्रण सुटले आणि गाडी रस्त्याच्या विरुद्ध बाजूला आली. त्याचवेळी पुढील टायरही फुटल्याने गाडी मोरीवर आदळली. या अपघातात गाडीच्या पुढील बाजूचा चक्काचूर झाला.

या अपघातातील जखमींची नावे : अंजली सतीश सकसुळे (वय ५२), सतीश विठ्ठलराव सकसुळे (५९), चेतना जितेंद्र ठाकूर (४२), संगीता नितीन रायचुरा (५४), संगीता ओमप्रकाश गोंधळे (४७), देवांशी जितेंद्र ठाकूर (१२), नितीन रायचुरा (५६), ओमप्रकाश गंगाराम गोडाणे (६०), जितेंद्र मानसिंग ठाकूर (४४, सर्व रा. अमरावती) व चालक शैलेश संपत बिरामणे (३२, रा. कोपरखैरणे नवी मुंबई) असे दहा भाविक जखमी झाले आहेत.