Gautami River : 'गौतमी’तून काढला 1400 ब्रास गाळ; उपशाने नदीपात्र रुंदावले

पावस : गेले किती वर्ष गाळमुक्त होण्यासाठी गौतमी नदी (Gautami River) प्रतीक्षेत होती. अखेर शासन व नाम फाउंडेशन आणि पावस ग्रामपंचायत (Pawas Gram Panchayat) यांच्या माध्यमातून गाळ काढण्याचे काम युद्धपातळीवर सुरू आहे.

गेल्या दहा दिवसांमध्ये जवळपास ६०० ते साडेसातशे डंपरच्या माध्यमातून सुमारे १४०० ब्रास गाळ बाहेर काढण्यात आला. त्यामुळे नदीपात्रामध्ये खोलगटपणा निर्माण झाला व पाण्याचे स्रोत वाढले.

चार वर्षांपूर्वी गणपती मंदिर ते बळगे स्मशानभूमीदरम्यान गौतमी नदीचा गाळ उपसण्यात आला होता. त्यामुळे नदीचे पात्र खोलगट झाले होते. पावसाळ्यामध्ये पावसाचे पाणी सरळ रेषेत वाहत होते. पोकलेन मशिनच्या साह्याने गाळ उपसण्याचे काम सुरू असून, नाम फाउंडेशनचे दोन डंपर व खासगी पाच डंपर अशा सात डंपरच्या माध्यमातून दररोज ३० ते ४० डंपरच्या माध्यमातून गाळ उपसला जात असून, तो अनेक खासगी क्षेत्रांमध्ये आवश्यकतेनुसार टाकला जात आहे. त्यासाठी अनेकजणांची या उपक्रमाला चांगली मदत होत आहे. त्यामुळे गाळ नदीपात्राबाहेर पाठवला जात आहे.

गेल्या दहा दिवसांच्या कालखंडामध्ये सुमारे ६०० ते ६५० डंपरच्या माध्यमातून १३०० ब्रास गाळ नदीपात्राबाहेर पाठवण्यात आला आहे. त्यामुळे नदीपात्राची उंची पाच ते सहा फूट झाली आहे. गाळ काढल्यामुळे त्या ठिकाणी पाण्याचे स्रोत वाढणार आहे. पंचायतीच्या माध्यमातून ज्यांना गाळाची आवश्यकता आहे, अशांना गाळ नेण्याचे आवाहन करण्यात आले आहे.

या संदर्भात उपसरपंच प्रवीण शिंदे यांच्याशी संपर्क केला असता ते म्हणाले, ग्रामपंचायतीच्या या उपक्रमाला ग्रामस्थांचा चांगला पाठिंबा मिळत आहे. त्याचबरोबर चिरेखाण संघटनेला गाळ वाहून नेण्यासंदर्भात कळवण्यात आले आहे; परंतु त्यांना गाळ वाहून आर्थिकदृष्ट्या परवडत नाही. ज्यांना आवश्यकता असेल तर त्यांनी गाळ घ्यावा, असे सांगण्यात आले आहे.