लॉकडाऊनच्या काळात रत्नागिरीत बनताहेत बाप्पा....

रत्नागिरी : टाळेबंदीच्या काळात घरात बसून काय करायचे हा प्रश्‍न अनेकांना पडला आहे. परंतु मूर्तीकार श्रीधर गोखले हे रत्नागिरीतून मुळ गावी गिर्ये (ता. देवगड) येथे गेले आहेत. तेथे त्यांनी चक्क लाडक्या गणपती बाप्पाच्या मूर्ती साकारण्यास प्रारंभ केला. एक ते दोन फुटांच्या सात मूर्ती साकारल्या असून दीड दिवसांत एक मूर्ती पूर्ण होते. यातून खूपच आनंद मिळत असल्याचे त्यांनी ‘सकाळ’ला सांगितले.

श्री. गोखले हे लहानपणापासून गणेशमूर्ती बनवतात. नोकरीनिमित्त रत्नागिरीत आल्यावरही त्यांनी येथे मूर्ती साकारल्या. एसटीमध्ये चालक असताना गंभीर अपघातात त्यांना अपंगत्व आले. परंतु त्यावर मात करत त्यांनी मूर्तीकलेचा छंद सोडला नाही. किंबहुना दरवर्षी ते पन्नास ते शंभर मूर्ती साकारू लागले. अलीकडे ते काही घरगुती गणपती साकारतात. तसेच रत्नागिरीत ते व पत्नी सौ. अर्चना गोखले या स्वामी समर्थ उपाहारगृहसुद्धा चालवतात.

हेही वाचा- खुशखबर :चिपळूणात दिल्लीत गेलेल्या त्या तिघांचे रिपोर्ट निगेटीव्ह...

टाळेबंदीचा असाही उपयोग
टाळेबंदीपूर्वीच श्री. गोखले सहकुटुंब गिर्ये येथे रवाना झाले. तेथे गेल्यावर्षीची शाडू मातीची पोती शिल्लक होती. 21 दिवसांच्या टाळेबंदीत मूर्ती बनवून आपला वेळ व्यतीत करायचा, यातून आनंद मिळवायचा, असे गोखले काकांनी ठरवले. दरवर्षी पावसाळ्यात कामाला सुरवात होते. यंदा 22 ऑगस्ट रोजी गणेशचतुर्थी आहे. पावसाळ्यात भरपूर पाऊस, आर्द्रता भरपूर असते. त्यामुळे मूर्ती बनवताना अडचणी येतात. रंग सुकण्यासाठी वेळ लागतो. वेळेवर साहित्य मिळत नाही. मात्र आता मुर्तीकाम अधिक वेगाने आणि शांतचित्ताने होत असल्याचे गोखले यांनी सांगितले. यातून खूपच आनंद मिळतो, असेही त्यांनी सांगितले.

हेही वाचा- कोकणातील शाहिरांची मुंबईकरांना भावनिक साद ; बंद केले आहेत रस्ते गावचे, दुःखी नाही व्हायचे ...

आंबा, केळी व्यवसायही संकटात

कोरोनाच्या (कोविड-19) वाढत्या संसर्गामुळे टाळेबंदीची मुदतही वाढण्याची भीती व्यक्त होत आहे. गिर्ये येथे श्री. गोखले यांनी आंबा व केळीची बागायत केली आहे. सध्या आंबा काढणी जोरात सुरू आहे. त्यातही गोखले आपला सकाळचा वेळ घालवतात. परंतु टाळेबंदीमुळे आंबा, केळी विक्री अडचणीत सापडल्याची खंत त्यांनी व्यक्त केली.