पालिका निवडणुकीत 2 नेत्यांचे वारसदार आमनेसामने; चुरस वाढणार?

चिपळूण : माजी आमदार रमेश कदम आणि विद्यमान आमदार तथा माजी मंत्री भास्कर जाधव या दोन नेत्यांचे वारसदार यावेळी पालिका निवडणुकीत उतरणार असल्याची उघड चर्चा सुरू आहे. त्यामुळे यावेळची निवडणूक लक्षवेधी ठरण्याची श्यक्यता आहे. शहरात पालिका निवडणुकीचे वारे जोरदार वाहू लागले आहेत. प्रत्येक पक्षाने निवडणुकांची तयारी सुरू केली असून उमेदवार चाचपणी सुरू करण्यात आली आहे. प्रभाग रचना आणि आरक्षणाबाबत अंदाज बांधले जात आहेत. त्यानुसार इच्छुकांची संख्याही वाढत आहे. आमदार जाधव यांचे सुपुत्र समीर जाधव यापूर्वी पालिका निवडणुकीत निवडून आले होते. परंतु आता ते थेट शिवसेनेचे धनुष्यबाण घेऊन निवडणूक रिंगणात उतरणार असल्याचे खात्रीशीर वृत्त असून शिवसैनिक देखील या वृत्ताला दुजोरा देत आहेत.

चिपळूणचे राजकारण आमदार भास्कर जाधव आणि माजी आमदार रमेश कदम यांच्या भोवती फिरत राहिले आहे. चिपळूण शहर माजी आमदार रमेश कदम यांचे होमपीच राहिले आहे. वर्षानुवर्षे त्यांनी येथील नगरपालिकेवर वर्चस्व ठेवले होते. परंतु गेल्या काही वर्षात कदमांची पकड ढिली होताना दिसत आहे. मात्र, यावेळी त्यांचे वारसदार अजिंक्य कदम प्रथमच राष्ट्रवादीच्या माध्यमातून निवडणूक रिंगणात उतरणार असल्याचे बोलले जात आहे. शहरातील बहादूरशेख येथील एका सुरक्षित प्रभागातून ते आपले नशीब अजमावण्याची शक्यता आहे. समीर जाधव त्यांचा बालेकिल्ला असलेल्या पाग येथील प्रभागातून पुन्हा एकदा मैदानात उतरणार आसल्याची चर्चा आहे.

दोन्ही बाजूने गुप्तता, तरी..

चिपळुणात सर्वच राजकीय पक्ष स्वःबळाची तयारी करत असल्याने प्रत्येक प्रभागात उमेदवारांची गर्दी होणार आहे. बहुतांशी निवडणुकीत चौरंगी लढत होण्याची चिन्हे आहेत. आता आमदार भास्कर जाधव व माजी आमदार रमेश कदम यांचे वारसदार या निवडणुकीत उतरणार असल्याची चर्चा राजकीय वर्तुळात सुरू आहे. दोघांनी आपले सुरक्षित वार्ड शोधण्यास सुरवात केली असली तरी राजकीय विरोधक असलेले दोन नेत्यांचे प्रतिष्ठा या निवडणुकीत पणाला लागणार आहे. दोन्ही बाजूने याबाबत गुप्तता पाळली जात असली तरी चिपळुणात या विषयाची जोरदार चर्चा सुरू आहे.