प्रतिसादाअभावी शिवशाहीचे तिकीट झाले कमी

रत्नागिरी - एसटी महामंडळाने शिवशाही स्लीपर सेवेचे तिकीट १२ फेब्रुवारीला मध्यरात्रीपासून कमी केले आहेत. रत्नागिरीतून सुटणाऱ्या मुुंबई, पुण्याकडील गाड्यांचे तिकीट दर १८० ते २४० रुपयांपर्यंत स्वस्त झाले आहेत. 

अप्रशिक्षित चालक आणि महामंडळाचा वाहक यांच्यातील समन्वयाचा अभाव, सातत्याने होणारे अपघात, सदोष सेवा यामुळे शिवशाहीला मिळणारा प्रतिसाद दिवसेंदिवस कमी होत होता. रत्नागिरीतील सहा फेऱ्यांचे दर कमी केले आहेत. रत्नागिरी-मुंबई तिकीट ९५५ वरुन ७१५ रुपये इतके झाले आहे.

२४० रुपयांनी प्रवास स्वस्त झाला आहे. संगमेश्वर- मुंबई फेरीचा दर ८३० वरून ६३० रुपये झाला असून २१० रुपये सूट मिळणार आहे. चिपळूण- मुंबईचा दर ७१५ वरून ५३५ रुपये केला असून १८० रुपये सूट मिळेल. रत्नागिरी-निगडीचे ९१० वरून ६८० रुपये झाले आहे. पाली- निगडी मार्गाचा दर ८४५ वरून ६३० रुपये केला असून २१५ रुपये सूट मिळणार आहे. साखरपा- निगडी मार्गावरील ७६५ रुपये तिकीट ५७० रुपये झाले आहे. 

सुटीत फायदा
सुटीच्या काळामध्ये अजूनही खासगी बससेमधून प्रवास करणाऱ्यांना चाट बसते; मात्र ग्राहकांचा तिकडे ओढा सर्वाधिक असतो. हे लक्षात घेऊनच शिवशाही बसेसचे कमी केलेले दर सुटीच्या हंगामात प्रवाशांसाठी किफायतशीर ठरणार आहे.