कणकवलीः चिपी विमानतळावर रात्रीही विमाने उतरता यावीत, यासाठी विद्युतीकरणाची कामे केली जाणार आहेत. त्‍यासाठी पालकमंत्री नीतेश राणे यांच्या माध्यमातून जिल्हा नियोजनमधून २ कोटी ३७ लाख ५७ हजार रुपयांचा कामाला प्रशासकीय मान्यता देण्यात आली आहे. विद्युतीकरणाची ही कामे पूर्ण होताच सिंधुदुर्गातील चिपी विमानतळावर रात्रीही विमाने उतरणे आणि उड्डाण करणे शक्‍य होणार आहे.
चिपी विमानतळाचे काम तीन वर्षांपूर्वीच पूर्ण झाले. मात्र, या विमानतळावर रात्रीच्या वेळेस विमान उड्डाण अथवा उतरण्याची सुविधा नाही. याअनुषंगाने पालकमंत्री नीतेश राणे यांनी फ्लाय ९१ च्या अधिकाऱ्यांशी सोमवारी (ता.२१) मंत्रालयातील आपल्या दालनात बैठक घेतली होती. यावेळी विमानतळावर विमाने उड्डाण तथा उतरण्यासाठी पुरेशी विद्युतीकरण व्यवस्था झाली नसल्‍याची बाब निष्पन्न झाली होती. त्‍यानंतर श्री. राणे यांनी विमानतळाच्या विद्युतीकरण कामासाठी जिल्हा नियोजनमधून आवश्‍यक असलेल्‍या २ कोटी ३७ लाख ५७ हजार रुपयांच्या खर्चाच्या कामाला प्रशासकीय मान्यताचे निर्देश जिल्हा प्रशासनाला दिले होते. त्‍या अनुषंगाने महावितरणच्या अधीक्षक अभियंत्यानी सादर केलेल्या प्रस्तावाला जिल्हाधिकारी अनिल पाटील यांनी आज प्रशासकीय मान्यता दिली आहे.
अंतर्गत कामे लवकरच पूर्ण
पाट (ता. वेंगुर्ले) फिडरकडून जाणाऱ्या ११ केव्ही वाहिनीच्या शिफ्टिंग व रूपांतरणासाठी सिंधुदुर्ग जिल्हा नियोजनमधून जिल्हा वार्षिक योजना कार्यक्रमांतर्गत २ कोटी ३७ लाख ५७ हजारांचा निधी मंजूर केला आहे. यात अंतर्गत विद्युतीकरण, वाढीव पथदिवे, अंतर्गत उच्च दाबाच्या वीजवाहिन्या, लघुदाबाच्या वीजवाहिन्या उभारणे, नवीन रोहित्र, रोहित क्षमता वाढवणे आदी कामांचा समावेश आहे. लवकरच ही कामे पूर्ण होऊन चिपी विमानतळावरून रात्रीही विमानांचे उड्डाण शक्‍य होणार असल्‍याची माहिती पालकमंत्री राणे यांच्या कार्यालयातून देण्यात आली.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.