देवगड हापूस वाशी बाजारात रवाना 

देवगड (सिंधुदुर्ग) - एकीकडे खराब हवामान, ढगाळ वातावरण, अशा स्थितीत यंदाच्या आंबा हंगामाची सुरुवात खडतर वाटत असतानाच आज तालुक्‍यातील कुणकेश्‍वर येथून दोन पेट्या हापूस वाशी फळबाजारात रवाना झाला. तेथील शेतकरी शंकर नाणेरकर यांचा हा हापूस आहे. यंदाच्या हंगामातील ही पहिलीच पेटी ठरणार आहे. 

आंबा हंगामाची नुकतीच चाहूल लागली आहे. अजूनही पूर्ण क्षमतेने तालुक्‍याच्या विविध भागांतील आंबा कलमे मोहोरलेली नाहीत. अलीकडेच थंडी पडायला सुरुवात झाली असल्याने आंबा हंगामाच्या दृष्टीने पोषक वातावरण तयार होते; पण अवकाळी पाऊस, ढगाळ वातावरण यामुळे बागायतदार चिंतेत आहेत. त्यातूनही यंदाच्या आंबा हंगामाच्या दृष्टीने दिलासादायक ठरणारी बाब म्हणजे तालुक्‍यातील कुणकेश्‍वर येथील एका बागायतदाराचा दोन पेटी आंबा वाशी फळबाजारात रवाना झाला. पाठवलेल्या आंब्याला किती दर मिळणार, याची माहिती लवकरच समजेल. 

संपादन - राहुल पाटील