वसतिगृहात हजेरीपत्रकावर मारल्या सह्या परंतु.....

कणकवली (सिंधुदूर्ग) : कणकवली-हरकुळ बुद्रूक गावच्या सीमेवरील डॉ.बाबासाहेब आंबेडकर शासकीय वसतिगृहात मुलांच्या आरोग्याशी खेळ सुरू आहे. सडलेले धान्य पोषण आहारासाठी वापरले जाते, अशी माहिती पंचायत समिती सभापती दिलीप तळेकर यांनी दिली.मागासवर्गीय मुलांच्या या वसतिगृहातील कारभाराची समाजकल्याण विभागाचे सहायक आयुक्‍त यांच्याकडे तक्रार नोंदवली आहे.

या तक्रारीनंतरही वसतिगृहाचा कारभार न सुधारल्यास आम्ही वसतीगृह अधीक्षकांना वठणीवर आणू असा इशाराही सभापती श्री. तळेकर यांनी दिला. वसतिगृहातील मुलांच्या सुविधेसाठी दरवर्षी ४० लाख रुपयांचा निधी येतो; मात्र या निधीतही भ्रष्टाचार होत असल्याचा आरोप सभापतींनी केला.वसतिगृहाची तळेकर यांनी आज पाहणी केली. त्यांच्यासोबत गटविकास अधिकारी मनोज भोसले, पंचायत समिती सदस्य गणेश तांबे, मिलिंद मेस्त्री तसेच पंचायत समितीचे इतर पदाधिकारी उपस्थित होते. वसतिगृह पाहणीनंतर सभापती श्री.तळेकर यांनी पत्रकार परिषद घेऊन त्याबाबतची माहिती दिली.

हेही वाचा - शिवरायांची कीर्ती सांगे, आईच माझा गुरू...! -

हजेरीपत्रकावर सह्या मात्र उपस्थिती....
ते म्हणाले, वसतिगृहात एकूण ६ कर्मचारी आहेत. यातील एक अर्जित रजेवर गेलाय. तर ४ कर्मचारी हजेरीपत्रकावर सह्या करून गैरहजर असल्याचे आढळून आले. फक्‍त कार्यालय अधीक्षक संतोष जाधव हेच तेथे उपस्थित होते. मात्र त्यांनी बेजबाबदारपणाची उत्तरे दिली. वसतिगृह ७५ मुलांचे आहे. तर हजेरीपटावर ३४ मुलांची नोंद आहे. तर प्रत्यक्षात १७ मुले उपस्थित आढळली. उर्वरीत १७ मुले कुठे गेली? 

हेही वाचा - खुनातील संशयितांची पोलिसांच्या हातावर तुरी -

अनेक गैरसोयी
श्री. तळेकर म्हणाले, पोषण आहारातील तांदूळ आणि गव्हाला कीड लागली आहे. मुलांना झोपण्यासाठीचे पलंग गंजलेले आहेत. चादर, बेडशिट मळलेल्या आहेत. वसतिगृह शहरापासून ६ किलोमिटर अंतरावर नेण्यात आलेय. पण मुलांना वाहतुकीची सुविधा नसल्याने त्यांना पायपीट करावी लागत आहे. वसतिगृहातील वरच्या मजल्यावरील शौचालय बंद आहे. तर तळमजल्यावरील शौचालयाची दुरवस्था आहे. प्रथमोचार सुविधा, अग्निशमन यंत्रणा कालबाह्य आहे.