खुनातील संशयितांची पोलिसांच्या हातावर तुरी

जयसिंगपूर (कोल्हापूर)  ः गुटखा चोरीच्या संशयावरून अमानुष मारहाणीत अर्जुन जगदीश (वय 27, रा. खटिरवा स्टुडिओ बंगळूर, कर्नाटक) याच्या खून प्रकरणातील संशयित आरोपींनी अद्यापही पोलिसांच्या हातावर तुरी दिली आहे. महेश दळवी (दानोळी), अभिजित धडेल (कोथळी), समीर जहांगीर पट्टेकरी (इचलकरंजी), साजिद पाटणी (रा. मुंबई, सध्या रा. अप्सरा हॉटेल मिरज) हे अद्याप फरार आहेत. बंगळूरमधून अथणी रोड मार्गावर गुटख्याची वाहतूक करताना कंटेनरमधील गुटख्याची पोती चोरीला गेल्याच्या संशयावरून मृतासह अन्य दोघांना दानोळी येथील फार्म हाऊसवर आणून त्यांच्यावर अमानुष मारहाण केली होती.

13 दिवसांपासून संशयितांचा पोलिस शोध घेत आहेत. कोल्हापूर, इचलकरंजी स्थानिक गुन्हा अन्वेषण विभाग आणि जयसिंगपूर पोलिसांकडून त्यांचा शोध सुरू आहे. दानोळी (ता. शिरोळ) येथील रेकॉर्डवरील गुन्हेगार महेश दळवी याच्या फार्म हाऊसमध्ये गुटखा चोरीच्या संशयावरून तिघांना अमानुष मारहाण झाली होती. विजेचा शॉक देत, हॉकी स्टिक, लाकडाच्या दांडक्‍याने मारहाण करून जखमांवर पेट्रोल आणि चटणीचे पाणी टाकून मारहाण केली होती. मारहाणीत अर्जुन जगदीश याचा मृत्यू झाला होता. 22 जानेवारीला ही घटना उघडकीस आली. पोलिसांच्या सतर्कतेमुळे खुनाला वाचा फुटली. अंकली टोल नाक्‍यावर नाकाबंदीत तीन वाहनांसह मृतदेह, दोघे जखमी आणि सहा संशयितांना ताब्यात घेतले होते, तर आणखी चार जण फरार आहेत.

आणखी दोघा जखमींच्या प्रकृतीत सुधारणा झाली आहे. त्यांना मारहाण करणाऱ्या आणखी चौघांच्या शोधासाठी पोलिस कसून शोध घेत आहेत. मृत अर्जुन हा बंगळूरमध्ये पेप्सीच्या कारखान्यात काम करून उदरनिर्वाह करत होता. गुटखा चोरीच्या प्रकरणात त्याचा कितपत सहभाग होता याबाबत पोलिस साशंक आहेत. अटकेत आरोपींकडून कसून चौकशी केली जात असून फरार असून पोलिस त्यांचा शोध घेत आहेत.