सोनपात्र, जगबुडी नदी प्रदूषणाविरोधात मच्छिमार आक्रमक

रत्नागिरी - सोनपात्र आणि जगबुडी नदीत होत असलेल्या प्रदूषणामुळे स्थानिक मच्छिमार आक्रमक झाले आहेत. प्रशासनाने याकडे लक्ष देऊन या प्रदूषणाला आळा घालावा यासाठी कोतवली येथील दर्यासारंग मच्छिमार भोई समाज संघटनेने 2 तारखेपासून उपोषण सुरू केले आहे.

लोटे औद्योगिक वसाहतीतील सांडपाणी अनेक वेळा प्रक्रिया न करता दाभोळ खाडीत सोडले जाते. गेल्या वर्षभरात अशा काही घटना मच्छिमारांनीच समोर आणल्या आहेत. या प्रदूषणामुळे सोनपात्र नदी, जगबुडी नदी, दाभोळ खाडीचे पात्र दूषित झालेले आहे. त्यामुळे खाडी पट्ट्यातील भोई समाजावर उपासमारीची वेळ आलेली आहे. अखेर भोई समाजाने उपोषणाचे हत्यार उपसले असून, खेड तालुक्यातील कोतवली येथील दर्यासारंग मच्छिमार भोई समाज संघटनेने गांधी जयंतीपासून आंदोलन सुरु केले आहे. जगबुडी खाडीच्या मुखाजवळ होडीत बसून प्रशासनाच्या विरोधात हे आंदोलन सुरु आहे. जवळपास 100 जण या आंदोलनात सहभागी झाले आहेत.