गोवळकोट जिल्हा परिषद शाळा पुन्हा मंदिरात 

चिपळूण - गोवळकोट जिल्हा परिषद शाळा मोकळी करून द्यावी, अन्यथा विद्यार्थ्यांना शाळेत न पाठविण्याचा पवित्रा शालेय व्यवस्थापन समितीने घेतला होता. मात्र, शाळा ज्या देवळात भरते. त्या श्री. देव करंजेश्‍वरी व श्री देव सोमेश्‍वर देवस्थान समितीने सहा महिन्यांची मुदतवाढ दिली. त्यामुळे यावर्षी पुन्हा मंदिराच्या सभागृहात गोवळकोट जिल्हा परिषद शाळा भरली आहे. 

गोवळकोट जिल्हा शाळेत सध्या वास्तव्य असलेल्या बौद्धवाडीतील दरडग्रस्त कुटुंबीयांच्या स्थलांतराची समस्या 6 महिने लांबणीवर पडली तरी ती कायम आहे. शहरातील गोवळकोट कदमवाडीतील 15 कुटुंबांना दरडीचा धोका असल्याने या कुटुंबाचे 2016 मध्ये स्थलांतर केले होते. यातील 9 कुटुंबे गेल्या तीन वर्षापासून गोवळकोट जिल्हा परिषद शाळेत वास्तव्य करीत आहेत. तर शाळेतील विद्यार्थ्यांना श्री देव करंजेश्‍वरी व श्री देव सोमेश्‍वर देवस्थान मंदिराच्या सभागृहात स्थलांतरित करण्यात आले होते. मात्र, गेल्या वर्षभरापासून शालेय व्यवस्थापन समितीने शाळेची इमारत पुन्हा विद्यार्थ्यांसाठी उपलब्ध करून देण्याची मागणी केली होती.

त्यासाठी शालेय व्यवस्थापन समितीचे पदाधिकारी प्रशासनाकडे वारंवार पाठपुरावा करीत होते. दरडग्रस्त कुटुंबांचे स्थलांतर करून शाळेची इमारत ताब्यात न दिल्यास मुले शाळेत न पाठविण्याचा पवित्रा पदाधिकाऱ्यांनी घेतला होता. देवस्थानचे पदाधिकारीही सभागृह मोकळे करून देण्याची मागणी करीत होते. जोपर्यत योग्य जागेत स्थलांतर होत नाही, तोपर्यंत शाळा न सोडण्याचा निर्णय दरडग्रस्त कुटुंबीयांनी घेतला होता. त्यामुळे स्थंलातराचा तिढा निर्माण झाला होता. 
 
तहसीलदारांनी काढला सुवर्णमध्य 

तहसीलदार जीवन देसाई यांनी देवस्थानचे पदाधिकारी, शालेय व्यवस्थापन समिती व दरडग्रस्थांची संवाद साधला. तहसीलदारांनी सुवर्णमध्य काढला. पावसाळ्याच्या कालावधीत सहा महिन्यांची मुदतवाढ देण्यात यावी, अशी विनंती देवस्थान समितीला केली. समितीने ती मान्य केल्याने देवस्थान सभागृहात गोवळकोट जिल्हा परिषद शाळा नियमित भरू लागली. या शाळेत पहिली ते सातवी दरम्यान 22 विद्यार्थी शिक्षण घेत असून चार शिक्षक कार्यरत आहेत.