कुडाळ प्रशासन `लेप्टो`बाबत सतर्क

कुडाळ (सिंधुदुर्ग) - कोरोनाबरोबरच तालुक्‍यात मोठ्या प्रमाणात लेप्टोची साथ व रूग्ण वाढत असल्याने या साथीवर नियंत्रण आणण्यासाठी तालुक्‍यातील सर्व जनतेने प्रशासनाला सहकार्य करावे, साथ रोग नियंत्रणात आणण्यासाठी शासनाच्या नियमावलीचे पालन करावे. नागरिकांनी आरोग्य तपासणी करावी. साथ पसरू नये, यासाठी प्रत्येकाने नियमावलीचे पालन करावे, अन्यथा कडक कारवाई करण्यात येईल, अशी माहिती पत्रकार परिषदेत येथील गटविकास अधिकारी विजय चव्हाण यांनी दिली. 

कोरोनासह कुडाळ तालुक्‍यात मोठ्या प्रमाणात लेप्टोचे रुग्ण आढळत आहेत. याबाबत प्रशासनाच्यावतीने माहिती देण्याकरिता येथील पंचायत समिती येथे आज सायंकाळी पत्रकार परिषदेचे आयोजन केले होते. यावेळी सभापती नूतन आहीर, उपसभापती जयभारत पालव, गटविकास अधिकारी विजय चव्हाण, तालुका आरोग्य अधिकारी डॉ. संदेश कांबळे आदी उपस्थित होते. 

चव्हाण म्हणाले, ""तालुक्‍यात आतापर्यंत सहा महिन्यात लेप्टोचे 93 रुग्ण सापडले आहेत. यामध्ये चार जणांचा लेप्टोने मृत्यू झाला आहे. सर्व रूग्णावर उपचार सुरू आहेत. लेप्टोवर औषध असूनही तालुक्‍यात मोठ्या प्रमाणात रुग्ण सापडत आहेत. याचे प्रमुख कारण तापसरीचे रूग्ण तपासणीकरीता येत नाहीत. प्रशासनाच्यावतीने लेप्टोची साथ पसरू नये यासाठी योग्य उपाययोजना, योग्य ती तपासणी केली सुरू आहे. गोळ्या वाटप सुरू आहेत.

ग्रामपंचायतस्तरावर कोरोना प्रतिबंधात्मक कृती समितीच्यावतीने आता साथ नियंत्रण करण्यासाठी सहकार्य घेण्यात येणार आहे. ही साथ आटोक्‍यात आणण्यासाठी प्रत्येकाने स्वतःची काळजी घ्यावी. ताप आला तर घाबरून न जाता प्रत्येकाने आरोग्य तपासणी करावी. कोरोना, लेप्टो, डेंग्यु, मलेरिया, माकडताप यासारख्या सर्व तपासण्या मोफत शासकीय रुग्णालयात केल्या जाणार आहेत.'' ते पुढे म्हणाले, ""कोरोना कमी होत असताना आता कोरोनाची दुसरी लाट येत आहे. त्याच बरोबर लेप्टोचे रुग्ण वाढत असल्याने या साथ रोगापासून तालुक्‍यातील सुमारे 1 लाख 30 हजार जनतेची काळजी घेण्यासाठी प्रशासनाला सर्व जनतेने सहकार्य करावे.'' 

प्रशासनाकडून योग्य काळजी 
डॉ. संदेश कांबळे म्हणाले, की कसाल, हिर्लोक, हुमरमळा-वालावल येथील प्राथमिक आरोग्य केंद्रातील प्रत्येकी पाच गावात तर कडावल प्राथमिक आरोग्य केंद्रातील तीन गावांत लेप्टोचे रूग्ण आहेत. जांभवडे व भुतवड गावात मोठ्या प्रमाणात रूग्ण आहेत. साथ आटोक्‍यात आणण्यासाठी योग्य ती प्रशासनाकडून काळजी घेण्यात येत आहे. शासकीय डॉक्‍टरांबरोबरच खाजगी डॉक्‍टरांचीही मदत घेण्यात येत आहे. 

संपादन - राहुल पाटील