बलात्कारप्रकरणीच्या खटल्यावरील तेजपालचा अर्ज फेटाळला 

पणजी : सहकारी महिला कर्मचाऱ्यावरील कथित बलात्कारप्रकरणीच्या खटल्यावरील सुनावणी रद्द करण्यासाठी संशयित तरुण तेजपाल याने केलेला अर्ज आज मुंबई उच्च न्यायालयाच्या गोवा खंडपीठाने फेटाळला. त्यामुळे त्याला आता म्हापसा येथील अतिरिक्त सत्र न्यायालयात सुरू असलेल्या खटल्यावरील सुनावणीला सामोरे जावे लागणार आहे. 
गोव्यातील एका महोत्सवावेळी संशयित तरुण तेजपाल याने स्वतःचीच सहकारी महिला कर्मचाऱ्याचा हॉटेलमधील लिफ्टमध्ये बलात्कार केल्याचा गुन्हा नोंद झाला होता व त्यावर न्यायालयात पोलिसांनी आरोपपत्र दाखल केले आहे. हे आरोपपत्र रद्द करण्यासाठी व खटल्यावरील सुनावणी रद्द करण्यासाठी त्याने उच्च न्यायालयात अर्ज केला होता. या उच्च न्यायालयाने आरोपपत्र रद्द करण्यासाठीची विनंती फेटाळून लावली तसेच खटल्यावरील सुनावणी घेण्यास अतिरिक्त सत्र न्यायालयाला परवानगी दिली मात्र त्यावरील निर्णय उच्च न्यायालयातील संशयिताच्या अर्जावर निवाडा होत नाही तोपर्यंत न देण्याचे निर्देश दिले होते. खंडपीठाने आज त्याचा हा अर्ज फेटाळल्याने सदर निर्देशही रद्दबातल ठरला आहे.