अन् पुणेकर चाकरमानी आल्या पावली परतले...

चिपळूण (रत्नागिरी) ः शहरासह ग्रामीण भागात कोरोना संसर्गाची दहशत वाढत असल्यामुळे कुंभार्ली घाटमार्गे कोकणात दाखल होणार्‍या चाकरमान्यांना शिरगाव पोलिसांनी प्रवेश नाकारला. त्यामुळे दीडशेहून अधिक चाकरमानी परत निघून गेले. पासधारक केवळ पंधरा जणांनाच प्रवेश देण्यात आला.

कोरोनाच्या पार्श्‍वभूमीवर मुख्यमंत्री उद्धव ठाकरे यांनी जिल्ह्याच्या सीमा बंद केल्या आहेत. मुंबई, पुणेसह मोठ्या शहरांमध्ये कोरोनाचा धोका अधिक असल्यामुळे नोकरी - धंद्यानिमित्त शहरात गेलेले चाकरमानी गावी परतत आहेत. संचारबंदीच्या काळात काम नसल्यामुळे हातावर पोट असलेले लोकही गावाकडे येत आहेत. मात्र जिल्हाबंदी असल्यामुळे अनेकांना येता येत नाही. जिल्हाधिकार्‍यांनी दिलेल्या आदेशाची पोलिसांकडून कडक अमलबजावणी केली जात आहे. त्यामुळे जिल्हाच्या सीमेपर्यंत आलेल्या लोकांना पुन्हा आपल्या कर्मभूमीत परतावे लागत आहेत.

हेही वाचा- दळवटणेतील त्या आजीसाठी पोलिस बनले देवदूत -

बाळहट्ट  लावले धुडकाऊन

पुणे व परिसरात राहणारे चिपळूण, गुहागर, खेड तालुक्यातील दिडशेहून अधिक चाकरमानी आज सकाळी कुंभार्ली घाटात दाखल झाले. तेथील चेकपोस्टवर पोलिसांनी त्यांना अडविले. येणार्‍यांपैकी जर कोणी आजारी असेल किंवा तो कोरोनाचा संशयित असेल तर त्याचा त्रास आरोग्य यंत्रणेसह सर्वांनाच होईल त्यामुळे कुंभार्ली घाटमार्गे येऊ इच्छिणार्‍यांना पोलिसांनी परत पाठविले. स्थानिक लोकप्रतिनिधींनी यामध्ये हस्तक्षेप करण्याचा प्रयत्न केला. मात्र त्यांचे बाळहट्ट पोलिसांनी धुडकाऊन लावले.

हेही वाचा- ब्रेकिंग - रत्नागिरीत टू व्हिलर लाही घातली आता बंदी ; जिल्हा प्रशासनाकडून कडक निर्णय 

चाकरमान्यांना परत पाठवा​

अलोरे - शिरगाव पोलिस ठाण्याचे सहाय्यक पोलिस निरिक्षक बडेसाहेब नाईकवाडी यांनी जिल्हा पोलिस अधिक्षक डॉ. प्रविण मुंढे व उपविभागीय पोलिस अधिकारी नवनाथ ढवळे यांच्याशी चर्चा केली. दोघांनी केवळ पास असलेल्या लोकांना आतमध्ये घ्या बाकींच्या चाकरमान्यांना परत पाठवा अशी सूचना केली. त्यानूसार 15 जणांना प्रवेश देण्यात आला.कुंभार्ली घाटमार्गे जे परवाना धारक लोक आज दाखल झाले त्यांची नोंद घेण्यात आली असून आरोग्य विभागाला त्यांची संपूर्ण माहिती देण्यात आली आहे. घराबाहेर पडू नका अशा सूचना करण्यात आल्या आहेत. आरोग्य विभागाकडून त्यांची वेळोवेळी चाचणी घेतली जाणार आहे.