Pali News : नॅशनल बेंच प्रेस व डेड लिफ्ट पॉवरलिफ्टिंग स्पर्धेत पालीतील वेदांत गायकवाड ची दैदिप्यमान कामगिरी

पाली - हरियाणा सोनिपत येथे शनिवारी (ता.6) व रविवारी (ता.7) झालेल्या नॅशनल बेंच प्रेस व डेड लिफ्ट पॉवरलिफ्टिंग स्पर्धेत पालीतील वेदांत अमित गायकवाड (वय 18) या युवकाने दैदिप्यमान कामगिरी केली आहे. वेदांतने बेंच प्रेस स्पर्धेत सुवर्ण व डेड लिफ्ट पॉवरलिफ्टिंग स्पर्धेत रौप्यपदक पटकावले आहे. वेदांतच्या या यशामुळे जिल्ह्यासह राज्याचे नावलौकिक झाले आहे.

सोमवारी (ता.8) वेदांत हरियाणा येथून रायगड जिल्ह्यात परतीच्या मार्गावर निघाला. दोन्ही स्पर्धा मिळून वेदांतने 227. 5 किलोग्राम वजन उचलले आहे.

वेदांत कोलाड येथील गीता दि. तटकरे या पॉलिटेक्निक कॉलेज मध्ये सिव्हिल इंजिनिअरिंग डिप्लोमाच्या पहिल्या वर्षात शिकत आहे.

मागील अनेक दिवसांपासून तो या स्पर्धेसाठी तयारी व कठोर मेहनत करत आहे. त्याने अत्यंत प्रतिकूल परिस्थितीत कडाक्याच्या थंडीत ही स्पर्धा खेळली व यश प्राप्त केले आहे.

त्याला या स्पर्धेसाठी वडील अमित गायकवाड व भाऊ श्रेयश वाघमारे यांनी मार्गदर्शन केले. तसेच वडील अमित व आई अरुणा यांनी प्रोत्साहन देऊन सर्व प्रकारचे सहकार्य केले आहे.