विनायक राऊतांना असे आपटू की, परत ते कोकणात दिसणार नाहीत

मालवण : खासदार विनायक राऊत (Vinayak Raut) यांनी आपल्या खासदारकीच्या काळात कोणतीही विकासकामे केली नाहीत. नारायण राणेंचे नाव घेतले की आपले सगळे काही झाकले जाईल या भ्रमात अजूनही ते वावरत आहेत; मात्र २०२४ ला राऊतांना एवढ्या जोरात आपटणार की परत कोकणात ते दिसणार नाही, असा इशारा भाजपचे प्रदेश सचिव, माजी खासदार निलेश राणे (Nilesh Rane) यांनी आज येथे दिला.

राऊत यांनी आपल्या खासदारकीचा वापर फक्त स्वतःच्या मुलाबाळांना आणि कुटुंबांना सेटल करण्यासाठी केला आहे. राणेंनी कार्यकर्त्यांना जेवढे जपले, तेवढ कोणालाही जमले नाही. वाक्याचा विपर्यास्त करण्याची जुनी सवय विनायक राऊतांना असून त्यांच्या बुद्धीप्रमाणेच ते सगळ्या गोष्टीचा विचार करणार अशी टीकाही राणे यांनी केली.

येथील निलरत्न निवासस्थानी राणे यांनी पत्रकारांशी संवाद साधला. यावेळी भाजपचे तालुकाध्यक्ष धोंडू चिंदरकर, जिल्हा सरचिटणीस अशोक सावंत, बाबा परब, सभापती अजिंक्य पाताडे, उपसभापती राजू परुळेकर, संतोष कोदे, नगरसेवक दीपक पाटकर, महेश मांजरेकर यांच्यासह भाजपचे अन्य पदाधिकारी आणि कार्यकर्ते उपस्थित होते.

यावेळी राणे म्हणाले, "फुकटचे श्रेय घेण्यासाठी सगळीकडे पुढेपुढे असणारे विनायक राऊत विकास कामांमध्ये कुठेही दिसत नाहीत. म्हणून त्यांना नेहमी राणे लागतात. राणेंशिवाय राऊतांचे कार्य शुन्य आहे. ते कधीही विकासकामांवर बोलताना दिसत नाहीत. ज्यांनी साधी एक बालवाडीही उघडली नाही, अशा माणसाची राणेंवर बोलण्याची कुवत नाही. अगोदर त्यांनी काहीतरी करून दाखवावे. साधी डिस्पेंसरी तरी उघडून दाखवावी.

स्वतःच्या खासदारकीचा वापर त्यांनी मुलाबाळांना सेट करण्यासाठी केला आहे. चिपी विमानतळ असो अथवा मुंबई गोवा महामार्गावरील टोल नाका. या प्रत्येक ठिकाणी स्वतःला काहीतरी मिळण्यासाठी राऊतांची धडपड आहे. त्यासाठी ते केंद्रातील मंत्र्यांना भेटत आहेत. विमानतळावर सिक्युरिटीसाठी मिळणारे कंत्राट स्वतःच्या भाच्याला मिळण्यासाठी विनायक राऊत प्रयत्न करत असल्याचा आरोपही राणे यांनी यावेळी केला.