सिंधुदुर्ग मधिल जैतीर यात्रेला यंदा भाविक मुकणार....

वेंगुर्ला (सिंधुदुर्ग) : कोरोनाच्या पार्श्वभूमीवर लाॅकडाऊनमुळे यावर्षी दि.२२ मे रोजी होणारा कोकणातील सुप्रसिद्ध जैतीर उत्सव शासन व प्रशासनाच्या नियमांशी अधीन राहून रद्द करण्याचा निर्णय तुळस देवस्थानचे मानकरी व देवस्थान समिती यांनी घेतला आहे.

तुळसचे ग्रामदैवत नराचा नारायण म्हणून प्रसिद्ध असलेला श्री.देव जैतीराचा उत्सव दरवर्षी लाखो भाविकांच्या उपस्थितीत साजरा होतो. सलग ११ दिवस चालणा-या या उत्सवास जिल्ह्यासहित मुंबई, ठाणे, पुणे, कोल्हापूर, बेळगाव, रत्नागिरी व नजीकच्या गोवा राज्यातून मोठ्या प्रमाणात भाविकांची उपस्थिती असते.

हेही वाचा- स्थानिकांना लाॅकडाऊनमध्येही आहेत रोजगाराच्या लाखो संधी पण...

मात्र शासकीय यंत्रणेने मोठ्या उत्साहात व पारंपारिक पद्धतीने (गर्दीत ) हा उत्सव साजरा करण्यास पायबंद घातलेला आहे. व तशा सुचनाही संबंधितांना मानकरी व देवस्थान कमिटीला दिलेल्या आहेत. तुळस गावात वर्षातून  ११  दिवस श्री देव जैतिर अवसारी नागरिकांच्या भेटीला येतो. यामुळे तुळस गावसाहित पंचक्रोशीत भक्तिमय वातावरण पाहायला मिळते. तथापी शासनाच्या व प्रशासनाच्या सुचनांचे काटेकोरपणे पालन करण्यासंबंधी जनजागृतीच्यादृष्टीने मानकरी व समिती सदस्य तुळस गावात घरोघरी फिरुन नागरिकांना सहकार्य करण्याचे आवाहन करीत आहेत.