मंडणगड : सोनल बेर्डेची चिठ्ठी ठरवणार सत्तेची खुर्ची?

मंडणगड : येथील नगरपंचायत निवडणुकीत(Nagar Panchayat Election) प्रभाग क्रमांक १ आदर्शनगरमध्ये निवडणूक अत्यंत रंगतदार झाली. सुमित्रा निमदे (शहर विकास आघाडी) व सोनल बेर्डे (अपक्ष) (Sonal Berde) या दोन्ही उमेदवारांना समान ६२ मते मिळाली. त्यामुळे ईश्वरी चिठ्ठी काढून त्यात बेर्डे या विजयी घोषित करण्यात आल्या. सोनल बेर्डे यांना लाभदायक ठरलेली ईश्वरी चिठ्ठी सत्तेची खुर्ची ठरवणार, अशी खुमासदार चर्चा सुरू आहे.

हा प्रभाग गतवेळी सचिन बेर्डे यांच्या रूपाने राष्ट्रवादी काँग्रेसच्या ताब्यात होता; मात्र या वेळी त्यांना उमेदवारी नाकारण्यात आल्याने त्यांच्या पत्नी सोनल या अपक्ष लढून विजयी झाल्या आहेत. हीच ईश्वरी चिठ्ठी आता सत्ता स्थापनेत निर्णायक भूमिका वठवण्याची शक्यता आहे. प्रभाग ४ व ५ मध्ये राष्ट्रवादीला धक्का बसला. प्रभाग क्र. ४ शिवाजीनगरमध्ये मुश्ताक दाभिळकर (अपक्ष) ११७, दीपक घोसाळकर (राष्ट्रवादी) ६३, श्रीपाद कोकाटे (काँग्रेस)३३, कल्पेश शिंदे (मनसे) २३, विजय पोटफोडे (अपक्ष) ४, संजय राणे (अपक्ष) ७, अशी मते मिळाली. ही बहुचर्चित लढत शहर विकास आघाडीचे अपक्ष उमेदवार मुश्ताक दाभिळकर यांनी जिंकली असून नगरपंचायतमध्ये प्रथमच मुस्लिम समाजाचा उमेदवार निवडून आणल्याचा दावा शहर विकास आघाडीच्या पदाधिकाऱ्यांच्या वतीने करण्यात आला आहे.

लेंढे यांचा पराभव

प्रभाग ५ साईनगरमध्ये राजाराम लेंढे (राष्ट्रवादी- ९४ मते) यांचा शहर विकास आघाडीचे अपक्ष उमेदवार योगेश जाधव यांनी १२९ मते घेत पराभव केला. दोन भाऊ विजयी झाले प्रभाग क्रमांक ११ धनगरवाडीमध्ये विनोद जाधव ८९ मते घेऊन विजयी झाले तर त्यांचेच भाऊ योगेश जाधव हे १२९ मते घेत प्रभाग क्रमांक ५ साईनगरमधून निवडून आल्याने नगरपंचायतीत प्रथमच दोन भाऊ नगरसेवक म्हणून काम करणार आहेत.