दाभोळ-दिव्यांग मर्चंडे यांचा आत्मदहनाचा इशारा

दिव्यांग मर्चंडे यांचा
आत्मदहनाचा इशारा
दाभोळ, ता. ३० ः विविध समस्यांबाबत प्रशासनाकडे पत्रव्यवहार, निवेदने देऊनदेखील शासनाकडून दुर्लक्ष केले जात असल्याने दिव्यांग धनाजी मर्चंडे यांनी न्याय न मिळालयास उद्या बुधवारी (ता. ३१) मे रोजी जिल्हाधिकारी यांच्या दालनात आत्मदहन करण्याचा इशारा जिल्हाधिकारी व पालकमंत्र्यांना एका निवेदनाद्वारे दिला आहे.
वडील रामचंद्र महादेव मर्चंडे यांच्या २००४ मध्ये मृत्यूनंतर त्यांचा वारस फेरफारने अर्जदार, आई व बहीण असे ५ जण वारस म्हणून लागले. अर्जदारांचे सामाईक खाते क्र. १८२ मध्ये २००८ ला मयत खातेदार सावित्री महादेव मर्चंडे यांचा वारस तपास फेरफार १८८३ मध्ये तलाठी सजा पिसई यांनी नजरचुकीने सर्वे नं. ४८, २८, ३ हाही सातबारा दाखवल्याने इतर खातेदारांची नावे मिळकतीत दाखल झाली. पुन्हा २००९ मध्ये मयत खातेदार धोंडूराम महादेव मर्चंडे यांचा वारस तपास फेरफार क्र. १९९२ ने इतर नावे दाखल झाली. याबाबत तलाठी, उपविभागीय अधिकारी यांना वारंवार कळवून, अर्ज करून तसेच अपील दाखल करूनही अद्याप न्याय मिळालेला नाही. मर्चंडे हे दिव्यांग असल्याने तहसील कार्यालयात झेरॉक्स सेंटर सुरू करण्याची मागणी करत आहेत; मात्र याकडे दुर्लक्ष केले गेले. मर्चंडे यांच्या घराकडे जाणाऱ्या रस्त्याकडेही ग्रामपंचायत दुर्लक्ष करत आहे. या समस्या न सोडवल्यास आत्मदहनाचा इशारा मर्चंडे यांनी दिला आहे.