जीवनमान सुधारण्यासाठी पंतप्रधान नरेंद्र मोदी कार्यरत

१४ (निवडणूक पानासाठी)

सर्वांगीण विकास भाजपच करू शकतो

नारायण राणे ः पावस, गोळप गटात कार्यकर्ता मेळावा

सकाळ वृत्तसेवा
पावस, ता. २ : देशाला महासत्ता बनवत असतानाच पंतप्रधान नरेंद्र मोदी हे महिला, युवक, शेतकरी आणि गरिबांचे जीवनमान सुधारण्यासाठी कार्यरत आहेत. यावर बोलण्याचे कुठलेच मुद्दे विरोधकांकडे नाहीत. ते जातीभेद निर्माण करत आहेत; मात्र पंतप्रधान मोदींनी नेहमीच माणुसकीचा धर्म जपत काम केले आहे. त्यामुळे असे नेतृत्व पुन्हा या देशाला मिळाले पाहिजे. सर्वांगीण विकास भाजपच करू शकतो, असे प्रतिपादन भाजप महायुतीचे रत्नागिरी-सिंधुदुर्ग लोकसभा मतदार संघाचे उमेदवार नारायण राणे यांनी केले.
रत्नागिरी तालुक्यातील पावस व गोळप जिल्हा परिषद गटात आयोजित करण्यात आलेल्या कार्यकर्ता मेळाव्यात ते बोलत होते. राणे म्हणाले, कुठलेही मुद्दे नसल्यामुळे विरोधक फक्त पंतप्रधान नरेंद्र मोदी, गृहमंत्री अमित शहा, उपमुख्यमंत्री देवेंद्र फडणवीस यांच्यावर टीका करत आहेत. संविधान बदलणार, असा अपप्रचार सुरू आहे; पण पंतप्रधानांनी कधीच जातीभेद, धर्मभेद केला नाही. मोफत अन्न, मोफत घर, औषध पाण्यासाठी, शेतकऱ्यांसाठी त्यांनी काम केले. या वेळी मंत्री उदय सामंत, शिवसेना तालुकाप्रमुख बाबू म्हाप, महिला आघाडीच्या कांचन नागवेकर, भाजपचे नाना शिंदे, माजी सरपंच लाईक फोंडू, शिवसेना पावस विभागप्रमुख विजय चव्हाण आदी उपस्थित होते.