वीज वाहिनी बदलण्याचे काम कलमठ पिंपळपार येथे सुरू

21190

वीज वाहिनी बदलण्याचे काम
कलमठ पिंपळपार येथे सुरू
कणकवली, ता. १ : कलमठ (ता. कणकवली) येथील पिंपळपार मंदिराच्या सभा मंडपावरून गेलेली वीज वाहिनी बदलण्याचे काम ‘महावितरण’ने आज सुरू केले. त्‍यामुळे कलमठवासीयांतून समाधान व्यक्‍त करण्यात आले.
कलमठ पिंपळपार सभामंडपावरून उच्च दाबाची वीज वाहिनी गेली होती. वादळ, तसेच पावसाळ्याच्या कालावधीत या वीजवाहक तारा सभा मंडपाला लागल्‍या तर मोठा अपघात होण्याची शक्‍यता होती. त्‍यामुळे सभा मंडपावरील वीजवाहक तारा हटवाव्यात, अशी मागणी इथल्‍या लोकप्रतिनिधींनी केली होती. कलमठ ग्रामपंचायत सदस्य धीरज मेस्त्री यांनी याअनुषंगाने २६ जानेवारी रोजी उपोषण केले होते. ३१ जानेवारीपूर्वी सभामंडपावरील वीज वाहिनी हटविण्यात येईल, अशी ग्‍वाही उपोषणकर्ते धीरज मेस्त्री यांना ‘महावितरण’कडून देण्यात आली होती. त्यानुसार आजपासून ‘महावितरण’ने येथील वीज वाहिन्या काढून त्‍या अन्य भागातून नेण्याची कार्यवाही सुरू केली आहे.