PAK vs ZIM : झिम्बाब्वेने पॉवर प्लेमध्ये पाकचे वाढवले होते टेन्शन मात्र...

Pakistan Vs Zimbabwe : टी 20 वर्ल्डकप 2022 मध्ये आज पर्थवर पाकिस्तान आणि झिम्बाब्वे यांच्यातील सामन्यात झिम्बाब्वेने 20 षटकात 8 बाद 130 धावा केल्या. नाणेफेक जिंकून प्रथम फलंदाजी करणाऱ्या झिम्बाब्वेने पॉवर प्लेमध्ये आक्रमक सुरूवात करत पाकिस्तानचे टेन्शन वाढवले होते. मात्र मोहम्मद वसिम आणि शादाब खान यांनी चांगला मारा करत झिम्बाब्वेच्या फलंदाजीला खिंडार पाडले. वसिमने 24 धावात 4 तर शादाब खानने 23 धावात 3 विकेट्स घेतल्या. झिम्बाब्वेकडून सेआन विलियम्सने सर्वाधिक 31 धावा केल्या.

सलामीवीर माधवेरे आणि कर्णधार क्रेग एर्विन 5 षटकात 42 धावा चोपून पाकिस्तानची हवा टाईट केली होती. पाकिस्तानची देखील इंग्लंडसारखी अवस्था होते का असे वाटत असतानाच पाकिस्तानच्या मदतीला हारिस रौऊफ धावून आला. त्याने कर्णधार क्रेगला 19 धावांवर बाद करत झिम्बाब्वेला पहिला धक्का दिला. पाठोपाठ मोहम्मद वसिमने माधवेरेला 17 धावांवर बाद करत झिम्बाब्वेची अवस्था 2 बाद 43 अशी केली. यानंतर लेग स्पिनर शादाब खानने झिम्बाब्वेला तीन धक्के देत त्यांची अवस्था 5 बाद 95 धावा अशी केली. दरम्यान, वसिमने झिम्बाब्वेच्या बॅटिंगचा कणा असलेल्या सिकंदर रझाला 9 धावांवर पॅव्हेलियनमध्ये पाठवले. याच षटकात वसिमने जाँगवेला शुन्यावर बाद करत आपला तिसरा मोहरा टिपला.

अखेर रेयान बर्ल आणि ब्रॅड एव्हान्स यांनी आठव्या विकेटसाठी 31 धावांची भागीदारी रचत संघाला 126 धावांपर्यंत पोहचवले. ही जोडी देखील वसिमने फोडली. त्याने एव्हान्सला 19 धावांवर बाद केले. दरम्यान नगारव्हा आणि बर्ल यांनी झिम्बाब्वेला 20 षटकात 130 धावांपर्यंत पोहचवले.