Indian Women Hockey : भारताकडून अमेरिका पराभूत

रौरकेला : भारतीय महिला हॉकी संघाने रविवारी येथे झालेल्या एफआयएच प्रो लीग या हॉकी स्पर्धेमध्ये अमेरिकन संघावर पेनल्टी शूटआऊटमध्ये २-१ असा विजय मिळवला. त्याआधी निर्धारित वेळेमध्ये दोन्ही देशांमध्ये १-१ अशी बरोबरी झाली होती.

भारत - अमेरिका यांच्यामधील लढतीत दीपिका हिने १९व्या मिनिटाला पेनल्टी कॉर्नरवर गोल करीत भारताला आघाडी मिळवून दिली होती. पण ४५व्या मिनिटाला सेसा ॲशले हिने अमेरिकन संघासाठी गोल करीत त्यांना १-१ अशी बरोबरी साधून दिली. त्यानंतर दोन्ही देशांना गोल करता आला नाही.

त्यामुळे निकालासाठी पेनल्टी शूटआऊटचा अवलंब करण्यात आला. पेनल्टी शूटआऊटमध्ये भारताकडून दोन गोल करण्यात आले. अमेरिकन संघाकडून लीह क्राऊस हिने एकमेव गोल केला.