MS Dhoni : अमित शहा - धोनी यांची भेट; सोशल मीडियावर होतोय फोटो व्हायरल

Amit Shah MS Dhoni : सध्या सोशल मीडियावर चेन्नई सुपर किंग्जचा कर्णधार महेंद्रसिंह धोनीचा एक फोटो तुफान व्हायरल होत आहे. या फोटोत भारताच्या सर्वात यशस्वी कर्णधारांपौकी एक असलेला धोनी हा देशाचे गृहमंत्री आणि भाजपचे वरिष्ठ नेते अमित शहा यांच्याशी हस्तांदोलन करताना दिसतो. हा फोटो पाहून काही नेटकऱ्यांनी धोनी भाजपमध्ये प्रवेश तर करणार नाही ना अशी शंका बोलून दाखवली.

या व्हायरल होत असलेल्या फोटोत एमएस धोनी हा अमित शहा यांच्याशी हसत हसत हस्तांदोलन करताना दिसतोय. धोनीने फॉर्मल शर्ट आणि पँट घातली आहे. हा फोटो एका सार्वजनिक कार्यक्रमातील आहे. अमित शहा आणि महेंद्रसिंह धोनी हे चेन्नईमध्ये एका कार्यक्रमादरम्यान एकमेकांना भेटले. हा कार्यक्रम इंडिया सिमेंटच्या 75 व्या स्थापना दिवसाचा होता. ही कंपनी बीसीसीआयचे माजी अध्यक्ष एन. श्रीनिवासन यांच्या मालकीची आहे. ते चेन्नई सुपर किंग्ज या आयपीएल संघाचे मालक देखील आहे. धोनी आणि एन. श्रीनिवासन यांची जवळीक सर्वांना माहिती आहेच.

दरम्यान, अमित शहा आणि महेंद्रसिंह धोनी यांच्या हस्तांदोलनचा फोटो सोशल मीडियावर चांगलाच व्हायरल झाला. नेटकऱ्यांनी धोनी भाजपमध्ये प्रवेश तर करणार नाही ना अशी शंका देखील व्यक्त केली. या फोटोवरून अनेक मीम्स देखील व्हायरल होत आहेत.