Asia Cup 2022 : पाकिस्तान - अफगाण राड्यानंतर रमीझ राजा करणार ICC कडे तक्रार

Asia Cup 2022 Afghanistan Pakistan Controversy : आशिया कपमधील पाकिस्तान अफगाणिस्तान सुपर 4 सामन्यात तुफान राडा झाला. अफगाणिस्तानचा वेगवान गोलंदाज फरीद अहमद मलिक आणि पाकिस्तानचा फलंदाज आसिफ अली यांच्यातील वादावादी एकमेकांच्या अंगावर धावून जाण्यापर्यंत गेली. या प्रकरणी आता पाकिस्तान क्रिकेट बोर्डाचे चेअरमन रमीझ राजा यांनी आपली प्रतिक्रिया दिली आहे.

अफगाणिस्तानने पाकिस्तानसमोर विजयासाठी 130 धावांचे आव्हान ठेवले होते. मात्र हे आव्हान पार करत असताना पाकिस्तानची चांगलीच दमछाक झाली. दम्यान, 18 व्या षटकात अफगाणिस्तानचा गोलंदाज फरीद अहमद मलिकने आसिफ अलीची विकेट घेतली. त्यानंतर सेलिब्रेशन करताना आसिफ आणि फरीदची वादावादी झाली. दरम्यान हा वाद एकमेकांच्या अंगावर धावून जाण्यापर्यंत गेला. आसिफ अलीने तर मलिकवर बॅट देखील उगारली होती. अखेर खेळाडू आणि पंचांनी मध्यस्थी करत या दोघांना एकमेकांपासून वेगळे केले. शेवटी पाकिस्तानने सामना 1 विकेट राखून जिंकला.

मात्र आता पीसीबीचे चेअरमन रमीझ राजा यांनी मैदानावरील हा वाद आयसीसीच्या दरबारात नेणार असल्याचे सांगितले. रमीझ राजा म्हणाले की, 'काल रात्री जे काही झालं त्याबद्दल आम्ही नक्कीच आयसीसीकडे आमची निराशा आणि दुःख आयसीसीपुढे मांडू.' यापूर्वी पाकिस्तानचा माजी वेगवान गोलंदाज शोएब अख्तरने देखील या प्रकरणावर भाष्य करताना अफगाणिस्तानचे खेळाडू आणि प्रेक्षकांना कसं वागायचं हे शिकण्याची गरज आहे.' पाकिस्तान - अफगाणिस्तान सामन्यातील मैदानात झालेला वाद हा नंतर प्रेक्षक गॅलरीत देखील पोहचला होता. अफगाणिस्तान आणि पाकिस्तानच्या चाहते स्टेडियममधील खुर्च्या एकमेकांना फेकून मारत होते.

दरम्यान, अफगाणिस्तान क्रिकेट बोर्डाचे माजी सीईओ शफिक स्तानिकझाई यांनी आसिफ अलीवर आशिया कपमधील पुढच्या सामन्यात बंदी घालावी अशी मागणी केली आहे.