सिंधू, प्रणोयचे आव्हान संपुष्टात; आशियाई बॅडमिंटन स्पर्धेत भारतीयांचे अपयश

निंगबो (चीन) : भारतीय खेळाडूंची आशियाई बॅडमिंटन स्पर्धेतील सुमार कामगिरी गुरुवारीही कायम राहिली. महिला विभागात पी. व्ही. सिंधू व पुरुष विभागात एच. एस. प्रणोय या दोघांचाही पराभव झाला. त्यामुळे या दोघांचेही प्रतिष्ठेच्या स्पर्धेतील आव्हान संपुष्टात आले.

चीनच्या हॅन युई हिने सिंधूची कडवी लढत २१-१८, १३-२१, २१-१७ अशी मोडून काढली. चीन तैपईच्या लिन चून यी याने प्रणोय याच्यावर २१-१८, २१-११ असा विजय साकारला. पी. व्ही. सिंधू हिने पहिल्या गेममध्ये दमदार सुरुवात केली.

८-४ अशी आघाडी घेणाऱ्या सिंधूने पुढे जाऊन आपला खेळ उंचावला आणि ही आघाडी १४-८ अशी पुढे नेली; मात्र यानंतर हॅन हिने सिंधूकडून झालेल्या चुकांचा फायदा घेतला. चीनच्या खेळाडूने प्रदीर्घ रॅलीचा खेळ करीत सिंधूला थकवले व १५-१५ अशी बरोबरी साधली.

त्यानंतर तिने २१-१८ असा पहिला गेम आपल्या नावावर केला. सिंधूने दुसऱ्या गेममध्ये आक्रमक खेळ केला. तिच्या आक्रमणासमोर हॅन हिचा निभाव लागला नाही. अखेर २१-१३ अशी बाजी मारण्यात सिंधूला यश मिळाले. दरम्यान, महिला दुहेरीत तनीषा क्रॅस्टो - अश्‍विनी पोन्नाप्पा या भारतीय जोडीलाही पराभवामुळे निराश व्हावे लागले.

संधी गमावली

पी. व्ही. सिंधू - हॅन युई यांच्यामध्ये तिसऱ्या गेममध्ये चुरस पाहायला मिळाली. सिंधू हिने सुरुवातीला ८-४ अशी महत्त्वपूर्ण आघाडी घेतली; पण हॅन हिने झोकात पुनरागमन करताना १०-१० अशी बरोबरी साधली. त्यानंतर सिंधू बॅकफूटवर गेली. हॅन हिने १७-१० अशी आघाडी मिळवली.

सिंधूने थोडीफार झुंज देताना ही आघाडी २०-१७ अशी कमी केली; पण तिला काही विजय मिळवता आला नाही. हॅन हिने २१-१७ असा हा गेम जिंकत सामनाही आपल्या नावावर केला. हॅन हिने सिंधूला प्रथमच नमवले. सिंधूने याआधी तिच्याविरुद्ध पाच सामने जिंकले होते.

सरळ दोन गेममध्ये मात

एच. एस. प्रणोय - लिन चून यी यांच्यामधील लढतीत पहिल्या गेममध्ये सुरुवातीला दोन्ही खेळाडूंमध्ये कडवा संघर्ष पाहायला मिळाला; मात्र ब्रेकपर्यंत लिन याने ११-७ अशी आघाडी घेतली. प्रणोयने तोडीस तोड खेळ करीत १५-१५ अशी बरोबरी साधली. लिन याने २१-१८ असा पहिला गेम जिंकताना प्रणोयला मागे टाकले. दुसऱ्या गेममध्ये लिन याने ड्रॉप शॉटस्‌ व आक्रमक स्मॅशेसच्या जोरावर प्रणोयवर वर्चस्व गाजवले. हा गेम त्याने २१-११ असा जिंकला व विजयासह आगेकूच केली.