FIFA WC22 : कॅमेरूनने रचला इतिहास! बलाढ्य ब्राझीलला पराभूत करण्याची केली किमया

Brazil vs Cameroon FIFA World Cup 2022 : यंदाची फुटबॉल विश्वकरंडक स्पर्धा धक्कादायक निकालांची नोंद करीत आहे. जपान, दक्षिण कोरिया, सौदी अरेबिया अशा निकालांमध्ये आज कॅमेरूनची भर पडली. आज रात्री झालेल्या सामन्यात कॅमेरूनने ब्राझीलचा १-० असा पराभव केला. गोल करणारा अबुबेकरने जल्लोषाच्या नादात अंगातील टी शर्ट काढून हवेत फिरविला आणि त्याच क्षणी पंचांनी त्याला रेड कार्ड दाखवत मैदानाबाहेरचा रस्ता दाखविला. बलाढ्य ब्राझीलला पराभूत करण्याची केली किमया केल्यानंतर कॅमेरूनने इतिहास रचला आहे. फिफा विश्वचषकात ब्राझीलला पराभूत करणारा पहिला आफ्रिकन संघ ठरला आहे.

उत्तरार्धात ब्राझीलच्या गोलपोस्टवर सतत धडका देणाऱ्या कॅमेरूनला अगदी ९० व्या मिनिटाला गोल करण्यात यश आले. उजव्या बगलेतून चेंडू घेऊन सुसाट सुटलेल्या नोगम बँकलीने उंचावर थेट डीच्या मध्यभागी पास दिला. ब्राझीलच्या तीन रक्षकांमध्ये घुसत अबुबेकरने त्यांच्या देशासाठी संस्मरणीय गोल गेला आणि तोच त्यांच्या विजयासाठी पुरेसा ठरला.

जादा नऊ मिनिटांच्या वेळेत ब्राझीलला गोल परत फेडण्यासाठी संधी साडेआठव्या मिनिटाला मिळाली होती; पण ती साधता आली नाही. कॅमेरूनचे स्पर्धेतील आव्हान संपुष्टात आले असले तरी त्यांनी ब्राझीलवर विजय मिळवत त्याचा गोड शेवट कैला. ब्राझील यापूर्वीच बाद फेरीत पोचले आहे. संपूर्ण सामन्यात ब्राझीलला ११ कॉर्नर मिळाले आणि त्यांनी २२ वेळा कॅमेरूनच्या गोलपोस्टच्या दिशेने धडका दिल्या; पण त्या साऱ्या व्यर्थ ठरल्या.