Ben Stokes : अंपायर्स कॉल रद्द करा ; इंग्लंड संघाचा कप्तान बेन स्टोक्सने डीआरएस प्रणालीवरून शंका

राजकोट : इंग्लंड संघाचा कप्तान बेन स्टोक्सने डीआरएस प्रणालीवरून शंका व्यक्त केली. दुसऱ्या डावात इंग्लंडच्या काही फलंदाजांना बाद ठरवताना टीव्हीवर रिप्ले बघून दिले गेलेले निर्णय न कळणारे होते, असेही म्हणाला. डीआरएस प्रणालीत अंपायर्स कॉल प्रकार बंद करायला पाहिजे, असे मत व्यक्त करताना बेन स्टोक्सने गोलंदाजाने टाकलेला चेंडू यष्टींवर आदळतोय का चाटून जातोय याला महत्त्व नसल्याचे सांगताना पायचीत असल्याची दाद मागितल्यावर चेंडू यष्टींना लागत असला तर फलंदाज बाद दिला गेला पाहिजे, असे मत व्यक्त केले.

काही वर्षांपूर्वी भारतीय संघाचा कर्णधार असताना विराट कोहलीनेही अंपायर्स कॉल रद्द करण्याची मागणी केली होती, परंतु त्याला फारसा कोणी प्रतिसाद दिला नव्हता. इंग्लंडचे माजी कर्णधार नासीर हुसेन यांनी मात्र अंपायर्स कॉल कायम राहिला पाहिजे असे मत व्यक्त केले आहे.

इंग्लंड संघाला घरचा आहेर

मोठ्या पराभवानंतर इंग्लंड संघावर त्यांच्या पत्रकार आणि माजी खेळाडूंनी अपेक्षित जोरदार टीका केली आहे. खास करून अनुभवी फलंदाज ज्यो रूटच्या बाद होताना मारलेल्या फटक्यांवरून जास्त राग व्यक्त केला गेला आहे. जरी बेन स्टोक्स विजय असो वा पराभव, दोनही मागे टाकून पुढच्या सामन्याचा विचार नव्याने करायची गोष्ट करत असला तरी सलग दोन कसोटीत झालेल्या पराभवांनी पाहुण्या संघाच्या मनोधैर्याला लागलेली ठेच स्पष्ट दिसत आहे.