Chandrayaan 3 : सराव, जेवण सोडून बसले होते डोळे लावून; टीम इंडियाही झाली चांद्रयान 3 मोहीमेची साक्षीदार

Chandrayaan 3 Team India : इस्त्रोचे चांद्रयान 3 मोहीम ही यशस्वी झाली. भारताच्या विक्रम लँडरने चंद्राच्या दक्षिण ध्रुवावर लँडिंग केले असून चंद्राच्या दक्षिण ध्रुवावर पोहचणारा भारत हा पहिलाच देश झाला आहे. तर चंद्रावर जाणारा भारत हा चौथा देश बनला आहे.

भारताच्या या यशस्वी मोहीमेनंतर इस्त्रोवर जगभरातून शुभेच्छांचा वर्षाव होत आहे. संपूर्ण भारत देशाने या चांद्रयान 3 च्या यशस्वी लँडिंगचा सोहळा लाईव्ह पाहिला. यात टीम इंडिया देखील मागे नव्हते. त्यांनी देखील चांद्रयान 3 मोहीम आयर्लंडमधून लाईव्ह पाहिली.

सध्या भारतीय संघ आयर्लंडमध्ये टी 20 मालिका खेळत आहे. आज या मालिकेतील तिसरा टी 20 सामना खेळत आहे. यासाठी संघ सराव करत होता. त्याचवेळी भारताचे चांद्रयान 3 हे चंद्राच्या दक्षिण ध्रुवावर उतरत होते.

टीम इंडियातील सर्व खेळाडूंनी हा सर्व सोहळा लाईव्ह पाहिला. यावेळी खेळाडूंनी आपले जेवणही बाजूला ठेवलं होतं. सर्व खेळाडू स्क्रीनसमोर उभे होते. भारताच्या विक्रम लँडरने यशस्वी लँडिंग केल्यानंतर टीम इंडियाने टाळ्या वाजवून जल्लोष केला.