भारताविरुद्धच्या कसोटी मालिकेबाबत संभ्रम; CSAने देशांतर्गत स्पर्धा केली रद्द

नवी दिल्ली : भारत विरुद्ध दक्षिण आफ्रिका (SA vs IND) कसोटी मालिकेला येत्या 26 डिसेंबरपासून सुरु होत आहे. मात्र यापूर्वीच दक्षिण आफ्रिका क्रिकेट बोर्डाच्या एका निर्णयामुळे दौऱ्याबाबत संभ्रम निर्माण झाला आहे. सध्या भारतीय संघ जोहान्सबर्गमध्ये कसोटी मालिकेसाठी कसून सराव करत आहे.

दरम्यान, दक्षिण आफ्रिका क्रिकेट बोर्डाने (Cricket South Africa) रविवारी देशांतर्गत खेळली जाणारी चार दिवसांची फ्रेंचायजी मालिका रद्द केली आहे. दक्षिण आफ्रिकेतील ही मोठी स्पर्धा आहे. देशातील कोरोनाच्या वाढत्या रुग्णसंख्येमुळे खबरदारीचा उपाय म्हणून हा निर्णय घेण्यात आला आहे. दक्षिण आफ्रिकेत गेल्या काही आठवड्यात कोरोना रुग्णांची संख्या वाढत आहे. त्यामुळे आता भारतीय संघातील (Team India) खेळाडूंच्या सुरक्षेबाबतही चिंता व्यक्त केली जात आहे. (SA vs IND)

क्रिकेट दक्षिण आफ्रिकाने (Cricket South Africa) प्रसिद्ध केलेल्या आपल्या वक्तव्यात म्हटले आहे की, 'देशांतर्गत स्पर्धा या बायो बबलच्या बाहेर आयोजित केल्या जात होत्या. त्यामुळे क्रिकेट बोर्डाने पाचव्या फेरीतील सामने स्थगित करण्याचा निर्णय घेतला आहे. हे डिव्हिजन 2 मधील सामने 16 डिसेंबर ते 19 डिसेंबर यादरम्यान खेळले जाणार होते. स्थगित केलेला देशांतर्गत सामन्यांचे आयोजन पुन्हा पुढच्या वर्षी केले जाईल.