भारताला पहिल्या सामन्यात पराभूत करणाऱ्या पाकिस्तानचा टी२० वर्ल्डकपमधील प्रवास काल थांबला. सेमीफायनलच्या सामन्यात ऑस्ट्रेलियाने त्यांना पराभूत केले. पाकिस्तानने २० षटकात १७६ धावा ठोकल्या होत्या. हे आव्हान पेलताना ऑस्ट्रेलियाला शेवटच्या २ षटकांत २०पेक्षाही जास्त धावा हव्या होत्या. त्यावेळी हसन अलीने मॅथ्यू वेडचा एक झेल सोडला आणि तिथून सामना पूर्णपणे पलटला. पुढील तीन चेंडूत तीन सिक्सर लगावत वेडने ऑस्ट्रेलियासाठी सामना जिंकला. या घटनेनंतर हसन अलीला प्रचंड टीकेचा सामना करावा लागला. पण, पाकिस्तानची महिला क्रिकेटपटू बिसमा मारूफ हिने त्याला धीर देत एक विशेष ट्वीट केले.
"प्रिय हसन अली, तू अनेक वेळा पाकिस्तान संघाला आणि देशाला अभिमानाचे क्षण दिले आहेस. सर्वोत्तम कामगिरी करत तू पाकिस्तानला अनेक मोठ्या स्पर्धा जिंकवून देण्यात मोलाचा वाटा उचलला आहेस. खेळावर तुझं अतोनात प्रेम आहे याची आम्हा साऱ्यांनाच कल्पना आहे. मैदानावरील तुझी ऊर्जा आणि हजेरी लक्षणीय असते. तू खचून जाऊ नकोस. खंबीर राहा आणि दमदार पुनरागन कर!", असा प्रेरणादायी संदेश तिने हसन अलीला दिला.
सामन्याच्या १९व्या षटकात ऑस्ट्रेलियाला १२ चेंडूत २२ धावांची गरज होती. पहिल्या दोन चेंडूत केवळ २ धावा आल्या. त्यानंतर तिसरा चेंडू मॅथ्यू वेडने हवेत उडवला. त्यावेळी हसन अलीने तो झेल सोडला आणि त्या चेंडूवर आणखी दोन धावा मिळाल्या. या चेंडूनंतर ऑस्ट्रेलियाला ९ चेंडूत १८ धावांची आवश्यकता होती. शाहीन आफ्रिदीच्या वेगवान माऱ्यापुढे हे लक्ष्य साध्य करणं खूप कठीण होतं. पण वेडने पुढील तीन चेंडूंवर तीन षटकार खेचत पूर्ण षटक राखून सामना खिशात घातला आणि संघाला फायनलचे तिकीट मिळवून दिले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
