"मी असं कधी बोललोच नाही"; राशिद खानने मारली पलटी?

अफगाणिस्तानचा स्टार फिरकीपटू राशिद खान हा IPL मध्ये चर्चेचा विषय ठरला होता. २०१७नंतर राशिद खान आपल्या खेळावर लक्ष देत कामगिरीत सुधारणा केली, पण यंदाच्या IPL मध्ये त्याला फारशी चमकदार कामगिरी करता आली नाही. युएईमध्ये IPL स्पर्धा झाली होती. तेथेच आता टी२० वर्ल्ड कप रंगणार आहे. या स्पर्धेत राशिद कशी कामगिरी करतो याकडे साऱ्यांचे लक्ष आहे. तशातच, राशिद खानने स्वत:बद्दल चर्चेत असलेल्या एका वक्तव्याबाबत खुलासा केला.

कोरोना काळात राशिद खानबद्दलचे एक वक्तव्य प्रसिद्ध झाले होते. 'जेव्हा अफगाणिस्तानचा संघ विश्वचषक स्पर्धेचे विजेतेपद पटकावेल त्यावेळीच मी लग्न करेन', असं वक्तव्य राशिद खानने केल्याचा दावा काही प्रसारमाध्यमांनी केली होता. याबाबत 'एएफपी'शी बोलताना राशिद खानने एक महत्त्वाचा खुलासा केला. "मी स्वत:च आश्चर्यचकित झालो होतो ज्यावेळी मला समजलं की माझ्या तोंडी असं वाक्य असल्याचा दावा केला जातोय. मी अगदी प्रामाणिकपणे सांगतो की अफगाणिस्तानने विश्वचषक जिंकला की मी लग्न करेन असं मी कधीच म्हटलं नव्हतं. मी असं म्हटलं होतं की आगामी काळात ३ वर्ल्ड कप स्पर्धा येत आहेत. २०२१ आणि २०२२ चा टी२० विश्वचषक आणि २०२३चा वन डे वर्ल्ड कप अशा तीन बड्या स्पर्धा रंगणार आहेत. त्यामुळे अशा परिस्थितीत लग्नाचा विचार करण्यापेक्षा मी स्वत:चे लक्ष क्रिकेटवर केंद्रीत करेन", असं स्पष्टीकरण राशिद खान याने दिलं.

मी IPL दरम्यान एक गोष्ट पाहिली. युएईमधील IPL स्पर्धेचे जे सामने झाले त्यात चेंडू टप्पा पडल्यावर फारसा स्पिन होत नव्हता. खेळपट्टीचा पोत उत्कृष्ट होता, पण चेंडूला अपेक्षित फिरकी प्राप्त होत नव्हती. पण मला असं वाटतं की या खेळपट्ट्यांवर जितका जास्त खेळ होईल तितकी खेळपट्टी फिरकीसाठी पोषक ठरेल. पण असं असलं तरी एक बाब लक्षात घ्यायला हवी की हे टी२० क्रिकेट आहे. त्यामुळे सामन्यांचा अंदाज बांधणं कठीण आहे", असंही राशिद खान याने स्पष्ट केले.