T20 WC बटलरची तुफानी खेळी; इंग्लंडनं उडवला कांगारुंचा धुव्वा

टी-20 वर्ल्ड कप स्पर्धेच्या सुपर 12 गटातील पहिल्या गटात इंग्लंडने आपली बादशाहत कायम ठेवलीये. ऑस्ट्रेलिया विरुद्धच्या सामन्यात सलग तिसरा विजय नोंदवत इंग्लंडचा संघ पहिल्या गटात अव्वल ठरलाय. इयॉन मॉर्गनने टॉस जिंकून पहिल्यांदा गोलंदाजी करण्याचा निर्णय घेतला होता. कर्णधाराचा निर्णय सार्थ ठरवत इंग्लंड गोलंदाजांनी तगड्या ऑस्ट्रेलियाला अवघ्या 125 धावांत रोखले होते.

माफक धावांचा पाठलाग करताना जोस बटलर आणि जेसन रॉय जोडीनं इंग्लंडच्या डावाला सुरुवात केली. या जोडीनं पहिल्या विकेटसाठी 6.2 षटकात 66 धावा केल्या. झम्पाने जेसन रॉयच्या रुपात ऑस्ट्रेलियाकडून पहिली विकेट घेतली. त्याची जागा घेण्यासाठी आलेला डेविड मलान अवघ्या 8 धावंची भर घालून माघारी परतला. एका बाजूनं या दोन विकेट्स पडल्या असताना दुसऱ्या बाजूनं बटलरची फटकेबाजी सुरुच होती. त्याने 32 चेंडूत 5 चौकार आणि 5 षटकारांच्या मदतीने 71 धावा कुटल्या. जॉनी बेयरस्टोनं 2 षटकार खेचून 11 चेंडूत नाबाद 16 धावा केल्या. या जोडीनं 8 विकेट्स राखून संघाला विजयी मिळवून दिला.