Ben Stokes IND vs ENG : इंग्लंडच्या कर्णधाराने तब्बल आठ महिन्याने पहिला चेंडू टाकला अन् हाती लागलं सोनं; Video व्हायरल

Ben Stokes Bowled after ashes 2023 Took Rohit Sharma Wicket India Vs England : भारताचा स्टार फलंदाज आणि कर्णधार रोहित शर्माने दुसऱ्या दिवशी खणखणीत शतकी खेळी करत कॅप्टन्स इनिंग खेळली. त्याने शुभमन गिलसोबत दुसऱ्या विकेटसाठी 171 धावांची भागीदारी रचत संघाला मजबूत स्थितीत पोहचवले.

दुसऱ्याच दिवशीच्या पहिल्या सत्रात सामना इंग्लंडच्या हातून निसटताना पाहून बेन स्टोक्सने एक मोठा डाव खेळला. त्याने गोलंदाजीत बदल करत स्वतः कर्णधार रोहितला गोलंदाजी करण्याचे ठरवले. विशेष म्हणजे स्टोक्स हा अॅशेस 2023 नंतर तब्बल आठ महिन्यांनी गोलंदाजी करत होता.

अन् एवढ्या दीर्घ कालावधीनंतर देखील गोलंदाजी करूनही बेन स्टोक्सला सोन्यासारखी विकेट पहिल्याच चेंडूवर मिळाली. त्याने कर्णधार रोहितचा 103 धावांवर त्रिफळा उडवला. रोहित बाद झाल्यानंतर मार्क वूडने देखील आपल्या कर्णधाराचा कित्ता गिरवला. त्याने शुबमन गिलला 110 धावांवर बाद करत भारताला अजून एक धक्का दिला.

मात्र या धक्क्यातून पदार्पण करणारा देवदत्त पडिक्कल आणि सर्फराज खानने भारताला सावरले. त्यांनी चौथ्या विकेटसाठी जवळपास शतकी भागीदारी रचत संघाला 375 धावांच्या पुढे पोहचवले. भारताकडे आता 158 धावांची आघाडी आहे.