Ind vs Sa Series : भारत-दक्षिण आफ्रिका खेळणार ODI-कसोटी अन् टी-20 मालिका, 'या' महिन्यात रंगणार थरार

India vs South Africa Women : दक्षिण आफ्रिकन महिला क्रिकेट संघ या वर्षी जून-जुलै महिन्यात भारत दौऱ्यावर मालिका खेळायला येणार आहे. भारत - दक्षिण आफ्रिका यांच्यामध्ये कसोटी, एकदिवसीय व टी-२० सामन्यांची मालिका खेळवण्यात येणार आहे. एकदिवसीय व टी-२० मालिका बंगळूरमध्ये, तर कसोटी चेन्नईमध्ये खेळवण्यात येणार आहे.

भारत-दक्षिण आफ्रिका या दोन देशांमध्ये १६ जूनपासून तीन सामन्यांच्या एकदिवसीय मालिकेला सुरुवात होणार आहे. चेन्नईमध्ये २८ जूनपासून एकमेव कसोटीला सुरुवात होईल. त्यानंतर पाच, सात व नऊ जुलै रोजी बंगळूरत टी-२० मालिकेचा थरार रंगणार आहे. या वर्षी सप्टेंबर महिन्यात महिलांचा टी-२० विश्‍वकरंडक खेळवला जाणार आहे. त्याआधी भारतीय महिला क्रिकेट संघाच्या सरावासाठी दक्षिण आफ्रिकेविरुद्ध टी-२० मालिकेचे आयोजन करण्यात आले आहे.

बीसीसीआय व दक्षिण आफ्रिकन क्रिकेट मंडळाच्या पुढाकाराने दोन देशांमध्ये एकमेव कसोटीचे आयोजन करण्यात येणार आहे. याआधी गेल्या वर्षी भारतीय महिला क्रिकेट संघ इंग्लंड व ऑस्ट्रेलिया यांच्याविरुद्ध प्रत्येकी एक कसोटी सामना खेळला. या दोन्ही कसोटींत भारतीय संघाने विजय संपादन केले.